ءماجىلىس دەپۋتاتى ازات پەرۋاشەۆ مەملەكەتتىك قىزمەتكەرلەردىڭ ەسكى قازاقستاننىڭ اكتيۆتەرىن قايتارۋ اياسىندا مەنشىك ءبولىسۋدى جانە بيزنەستى رەيدەرلىك جولمەن تارتىپ الۋ تەندەنتسياسىنىڭ كۇشەيگەنىن مالىمدەدى. دەپۋتات وسى ماسەلە بويىنشا باس پروكۋراتۋرا مەن پرەمەر-مينيسترگە رەسمي سۇراۋ جولدادى، دەپ حابارلايدى "ادىرنا" ۇلتتىق پورتالى.
پەرۋاشەۆتىڭ ايتۋىنشا، پارتياعا ءارتۇرلى سالادا قىزمەت اتقاراتىن كاسىپكەرلەردەن مەملەكەتتىك قىزمەتكەرلەردىڭ ءوز وكىلەتتىكتەرىن مەنشىك ءبولىسۋ جانە بيزنەستى رەيدەرلىك جولمەن باسىپ الۋ ءۇشىن پايدالانۋ تەندەنتسياسى جونىندە حابارلامالار تۇسۋدە.
"تۇركىستان وبلىسى سارىاعاش اۋدانىنىڭ اكىمدىگى بولات نازارباەۆتىڭ مۇلكىن قايتارۋ سىلتاۋىمەن كورشى كاسىپكەرلەردەن 2017 جىلى قارجى مينيسترلىگىنىڭ اشىق اۋكتسيونىنان بىرىڭعاي لوتپەن ساتىپ الىنعان ساناتوري نىساندارىنىڭ ءبىر بولىگىن تارتىپ العانىن مىسال رەتىندە ايتۋعا بولادى. وسىعان بايلانىستى ساناتوري 2 ميلليارد تەڭگە كولەمىندە شىعىنعا ۇشىرادى. وسى سياقتى "قتج" اكتسيونەرلىك قوعامى ارقىلى پاۆلودار وبلىسىنداعى اتىعاي ستانتسياسىنداعى عيماراتتى جانە تەمىرجول جولدارىن 2011 جىلى سالعان "انگرەنسور Ltd" جشس-نەن تەگىن الىپ بەرۋ ءۇشىن سوت ارقىلى مىندەتتەدى. بۇل وبەكتىلەردىڭ قۇنى 1,5 ميلليارد تەڭگەدەن اسادى. وسى سياقتى باسقا دا حابارلامالار ءتۇرلى ايماقتاردان كەلىپ جاتىر. بۇل – مەنشىك ءبولىسۋدىڭ تۇتاس ءبىر تاجىريبەسى قالىپتاسىپ كەلە جاتقانىنىڭ بەلگىسى", – دەدى دەپۋتات ءوز سۇراۋىندا.
پەرۋاشەۆتىڭ ايتۋىنشا، رەيدەرلەر كەيدە بۇل ارەكەتتەردى ەسكى قازاقستاننىڭ داۋلى تۇلعالارى مەن وليگارحتارىمەن بايلانىستى زاڭسىز اكتيۆتەردى قايتارۋمەن اقتاۋعا تىرىسادى.
"اك جول" دەموكراتيالىق پارتياسى وسى باعىتتا ناقتى جۇمىستاردى تولىقتاي قولدايدى. ءبىز 2013 جىلدان باستاپ بۇل تاقىرىپتا كوپتەگەن دەپۋتاتتىق سۇراۋلاردى جولدادىق جانە ءتيىستى زاڭدى تالقىلاۋعا بەلسەنە قاتىستىق. شىنىندا دا، ەسكى قازاقستاننىڭ زاڭسىز اكتيۆتەرىن قايتارۋ اياسىندا ەرىكتى پروتسەدۋرا قاراستىرىلعان. الايدا، جوعارىدا اتالعان مىسالداردىڭ ەشقايسىسىندا وليگارحتار تۋرالى ءسوز بولمايدى. سارىاعاشتاعى ساناتوري جاعدايىندا مارقۇم بولات نازارباەۆتىڭ كومپانياسىنا وبەكتىلەر قايتارىلعان، ال ادال كاسىپكەرلەردىڭ زاڭدى تۇردە اۋكتسيوننان ساتىپ الىنعان مۇلكى وسى سىلتاۋمەن تاركىلەنگەن", - دەدى پەرۋاشەۆ.
