فۋتبولدى دامىتۋ ماسەلەلەرى تالقىلانعان جيىندا وبلىس اكىمى ەرماعانبەت بولەكپاەۆ «شاحتەر» كلۋبىنىڭ باسقارۋ مودەلىن سىنعا الدى. سوڭعى كەزدە كوماندانىڭ سپورتتىق جەتىستىكتەرى كوڭىل كونشىتپەيدى. قازىرگى ماۋسىم قورىتىندىسى بويىنشا «شاحتەر» تىزىمدە سوڭعى ورىندا، ياعني پرەمەر-ليگادان شىعىپ، ءبىرىنشى ليگا دەڭگەيىنە تۇسۋگە – باستى ۇمىتكەر.
– بۇل – وڭىرلىك فۋتبول ساياساتىندا جۇيەلى تۇردە ورىن العان ولقىلىقتاردىڭ ناتيجەسى. وكىنىشكە قاراي، كلۋبتىڭ ۇزاق مەرزىمدى دامىتۋ مەجەسى، ماركەتينگتىك ستراتەگياسى جوق، – دەدى ايماق باسشىسى. – فۋتبولشىلاردىڭ ىرىكتەۋ جۇيەسى سىن كوتەرمەيدى. 25 فۋتبولشىنىڭ 12-ءسى – لەگيونەر. جالپى العاندا، كلۋب شەتەلدىك لەگيونەرلەردى قولداۋ قورىنا اينالدى. تۇراقتى قارجىلىق مودەل جاسالماعان.
تىعىرىقتان شىعۋ جولى رەتىندە ەرماعانبەت بولەكپاەۆ بىرقاتار شۇعىل جانە ستراتەگيالىق شارالاردى قابىلداۋ قاجەتتىگىن مالىمدەدى. ونىڭ ىشىندە باسقارۋ تاسىلدەر مەن كادرلىق قۇرامدى قايتا قاراۋ – كەزەك كۇتتىرمەيتىن ماسەلە. ءبىر ايدىڭ ىشىندە كلۋبتىڭ ستراتەگياسىن ازىرلەۋ كەرەك، ونىڭ اياسىندا فۋتبول ينفراقۇرىلىمىن دامىتۋ جوسپارىن ەسكەرۋ قاجەت.
سونداي-اق، وبلىس اكىمى بالالار مەن جاسوسپىرىمدەر فۋتبولىن دامىتۋ، وتاندىق مامانداردى دايارلاۋعا قاتىستى تاپسىرمالار بەردى.
بىرىنشىدەن، وڭىرلىك دسك-لار نەگىزىندە «شاحتەر» فۋتبول كلۋبىنىڭ فيليالدارىن اشۋ قاجەت. بۇل كلۋب اكادەمياسىنا ىرىكتەۋ ءۇشىن سەلەكتسيالىق جۇيە قۇرۋعا مۇمكىندىك بەرەدى. ەكىنشىدەن، جەرگىلىكتى جاس دارىندارعا جول اشۋ ماقساتىندا كەلەسى جىلى بالالار مەن جاسوسپىرىمدەر كوماندالارى اراسىندا فۋتبول ءتۋرنيرىن ۇيىمداستىرۋدى تاپسىردى.
– مەملەكەت باسشىسى كاسىبي جانە بۇقارالىق سپورتتى دامىتۋ بويىنشا بىرقاتار مىندەتتەردى ايقىنداپ بەردى. وسىعان بايلانىستى جوعارى بىلىكتى مامانداردى دايارلاۋ قاجەت. وبلىستا بالالار مەن جاسوسپىرىمدەر فۋتبولىن دامىتۋ بويىنشا فۋتبول ورتالىعى مەن اكادەميانىڭ جۇمىسىن كۇشەيتۋ قاجەت. بالالار جاتتىقتىرۋشىلارىن وقىتۋدى، ونىڭ ىشىندە ولاردى شەتەلدە وقىتۋ مۇمكىندىكتەرىن قاراستىرۋ كەرەك، – دەپ اتاپ ءوتتى ەرماعانبەت بولەكپاەۆ.
ناقتى سپورتتىق مەجە – «شاحتەر» كەلەسى ماۋسىمدا-پرەمەر-ليگا قۇرامىنا ورالۋى كەرەك.
جيىن بارىسىندا ەرماعانبەت بولەكپاەۆ فۋتبول مەن سپورتتى دامىتۋدىڭ جالپى جوسپارى تۋرالى ايتىپ بەردى. ماسەلەن، قاراعاندىدا سپورتتىق كلاستەر قۇرىلىپ، ونىڭ اياسىندا ۋەفا ستاندارتتارىنا سايكەس زاماناۋي ستاديون، جىل بويى جاتتىعۋعا بولاتىن فۋتبول مانەجىن سالۋ جوسپارلانۋدا. ول ءۇشىن قالا اۋماعىندا 67 گەكتار جەر قاراستىرىلعان. بۇدان باسقا، كەلەسى جىلى قالاداعى ورتالىق ستاديون جاڭارتىلادى.
