قارجىلىق مونيتورينگ اگەنتتىگىنىڭ ءباسپاسوز قىزمەتى «كەزبي» كومپانياسىنا قاتىستى قاراجاتتى جىمقىرۋ جانە سالىق تولەۋدەن جالتارۋ فاكتىلەرى بويىنشا سوتقا دەيىنگى تەرگەۋ باستالعانىن مالىمدەدى، دەپ حابارلايدى «ادىرنا» ۇلتتىق پورتالى.
ماڭعىستاۋ وبلىسى بويىنشا قما دەپارتامەنتى «كەزبي» جشس اتقارۋشى ديرەكتورى ەرجان كەزباەۆقا قاتىستى، قازاقستان رەسپۋبليكاسىنىڭ قىلمىستىق كودەكسىنىڭ 190-بابىنىڭ 4-بولىگى، 2-تارماعى («اسا ءىرى كولەمدەگى الاياقتىق») بويىنشا قىلمىستىق ءىس قوزعادى.
ول «وزەنمۇنايگاز» اق كومپانيا قىزمەتكەرلەرىنە ەڭبەكاقى تولەۋگە بولىنگەن 321 ميلليون تەڭگەنى جىمقىردى، جانە شامامەن 1,5 ميلليارد تەڭگە كولەمىندە سالىق تولەۋدەن جالتاردى دەگەن كۇدىككە ىلىنگەن.
«2021 جىلى «كەزبي» جشس «وزەنمۇنايگاز» اق-مەن بريگادا ساعاتىنا 65 مىڭ تەڭگە باعامەن جوندەۋ جۇمىستارىن جۇرگىزۋگە كەلىسىمشارت جاسادى. كەيىن جۇمىسشىلاردىڭ جالاقىسى مەن مەديتسينالىق جاردەماقىنى ارتتىرۋ ماقساتىندا قۇنى بريگادا ءۇشىن ساعاتىنا 87 مىڭ تەڭگەگە دەيىن ۇلعايتىلدى. الايدا، تەرگەۋ مالىمەتىنشە، وسى قاراجاتتىڭ ەلەۋلى بولىگى، اتاپ ايتقاندا 321 ميلليون تەڭگە، الەۋمەتتىك جاعدايدى جاقسارتپاي، كومپانيا باسشىسى تاراپىنان جىمقىرىلعان»، - دەپ حابارلادى قما.
بۇگىن كۇدىكتى ەرجان كەزباەۆ قاماۋعا الىندى. قازىرگى ۋاقىتتا جاسالعان قىلمىستىڭ ءمان-جايىن انىقتاۋعا باعىتتالعان تەرگەۋ شارالارى جۇرگىزىلۋدە.
قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە مالىمەتتەردى جاريالاۋعا بولمايدى.
