شانحاي ىنتىماقتاستىق ۇيىمى يران يسلام رەسپۋبليكاسىنىڭ اسكەري نىساندارىنا جاسالعان شابۋىل تۋرالى مالىمدەدى، دەپ حابارلايدى "ادىرنا" ۇلتتىق پورتالى.
قازاقپارات مالىمەتىنشە، شىۇ ءباسپاسوز قىزمەتى ارنايى مالىمدەمە جاريالاعان.
"شانحاي ىنتىماقتاستىق ۇيىمىنا مۇشە مەملەكەتتەر 2024 جىلدىڭ 26 قازانىندا يران يسلام رەسپۋبليكاسىنىڭ اسكەري نىساندارىنا جاسالعان شابۋىلدى قاتاڭ ايىپتايدى. شىۇ-عا مۇشە مەملەكەتتەر حالىقارالىق بەيبىتشىلىككە، قاۋىپسىزدىك پەن تۇراقتىلىققا ناقتى قاۋىپ ءتوندىرۋى مۇمكىن تاياۋ شىعىستاعى جاعدايدىڭ شيەلەنىسۋىنە قاتتى الاڭداۋشىلىق ءبىلدىردى. شىۇ-عا مۇشە مەملەكەتتەر حالىقارالىق قۇقىقتىڭ جالپى تانىلعان نورمالارىن، سونىڭ ىشىندە بۇۇ جارعىسىندا بەكىتىلگەن نورمالاردى ساقتاي وتىرىپ، وسى ايماقتاعى جاعدايدى تەك ساياسي جانە ديپلوماتيالىق قۇرالدار ارقىلى تۇراقتاندىرۋ بويىنشا ءتيىمدى شارالاردى تەز ارادا قابىلداۋدى جاقتايدى", - دەلىنگەن حابارلامادا.
ايتا كەتەيىك، يران، قازاقستان، قىتاي، قىرعىزستان، پاكىستان، رەسەي، تاجىكستان، وزبەكستان جانە ءۇندىستان - شىۇ-عا مۇشە ەلدەر. اۋعانستان، بەلارۋس جانە موڭعوليا ۇيىمعا باقىلاۋشى ەلدەر ستاتۋسىندا قاتىسىپ وتىر. ال قازان ايىندا يزرايل يرانعا شابۋىل جاساعان بولاتىن.
