ۇكىمەت باسشىسى بەكتەنوۆ ەلىمىزدە TikTok جەلىسىنىڭ جۇمىسىنا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
ونىڭ سوزىنشە، تikTok-تىڭ قازاقستانداعى رەسمي وكىلدىگىمەن تىعىز بايلانىستا جۇمىس جۇرگىزىلىپ جاتىر.
“جاس پايدالانۋشىلاردى زياندى كونتەنتتەن قورعاۋ ماقساتىندا پلاتفورما تىركەلۋ فورماسىن ازىرلەدى، وندا تولىق تۋعان كۇنىن كورسەتۋ قاجەت، ويتكەنى TikTok 13 جاسقا تولماعان پايدالانۋشىلارعا ارنالماعان. پلاتفورما اۆتوماتتى تۇردە جانە قولمەن مودەراتسيالاۋدى قولدانا وتىرىپ، كورسەتىلگەن كونتەنتتى (ەكسترەميزمدى، راديكاليزمدى، سەپاراتيزمدى، شەكتەن تىس قاۋىپتى جانە مورالدىق قۇندىلىقتارعا قايشى كونتەنتتەر) انىقتاۋ جانە شەكتەۋ ءۇشىن الگوريتم ازىرلەدى”، – دەلىنگەن پرەمەر-مينيستر حابارلاماسىندا.
سونىمەن قاتار ەلىمىزدە جەلىدەگى اۆتوماتتى مودەراتسيا بەكىتىلگەن بىرىڭعاي ەرەجەلەردى بۇزاتىن كونتەنتتى انىقتاي الادى جانە جەدەل ارەكەت ەتۋگە مۇمكىندىك بەرەدى.
“كونتەنتتى مودەراتسيالاۋدىڭ ەكىنشى ءادىسى TikTok پايدالانۋشىلاردان "شاعىمدانۋ" فۋنكتسياسىنا سايكەس تۇسەتىن شاعىمدارعا نەگىزدەلگەن (اككاۋنتقا، بەينەگە نەمەسە پىكىرگە). مودەراتور كوماندالارى جەرگىلىكتى داۋلى كونتەنتتى تەكسەرەدى جانە ەگەر ول پايدالانۋشىلارعا قاۋىپ توندىرسە، ونى جويادى. پلاتفورما اتالعان مودەراتورلار توبىن ۇنەمى جاتتىقتىرىپ تۇرادى”، – دەلىنگەن رەسمي جاۋاپتا.
ۇكىمەت Tik Tok جەلىسىنىڭ رەسمي ۇستانىمى جەرگىلىكتى قوعامنىڭ قاۋىپسىزدىگىن ساقتاۋ ەكەنىن دە ەرەكشە اتاپ ءوتتى.
“13 جاسقا تولماعان اككاۋنت يەلەرىنىڭ جويىلعان ەسەپتىك جازبالارىنىڭ سانىن كوپشىلىككە جاريا ەتكەن العاشقى ءىرى پلاتفورما Tik Tok بولدى. 2024 جىلدىڭ قاڭتار-تامىز ايلارى ارالىعىندا TikTok 13 جاسقا تولماعان پايدالانۋشىلارعا تيەسىلى قازاقستانداعى 1 239 635 ەسەپتىك جازبانى جويدى، ال وتكەن جىلى ولاردىڭ سانى 1 842 467 ەسەپتىك جازبانى قۇرادى”، – دەلىنگەن حابارلامادا.
ايتا كەتەيىك، سەناتور گەننادي شيپوۆسكيح پرەمەر-مينيستر ولجاس بەكتەنوۆكە جولداعان دەپۋتاتتىق ساۋالىندا TikTok-تى بۇعاتتاۋ كەرەك دەپ سانايتىنىن حابارلاعان ەدىك.
سونداي-اق، كورشىلەس قىرعىزستاندا TikTok جەلىسىن قولدانۋعا تىيىم سالىنعان بولاتىن.
