قازاقستان پرەزيدەنتى قاسىم-جومارت توقاەۆ سەنبى كۇنى تاجىكستان پرەزيدەنتى ەمومالي راحمونمەن كەلىسسوز جۇرگىزدى، دەپ حابارلايدى “ادىرنا”.
كەزدەسۋ بارىسىندا ەكى ەل اراسىنداعى ساۋدا-ەكونوميكالىق جانە مادەني-گۋمانيتارلىق بايلانىستاردى دامىتۋ ماسەلەلەرى تالقىلاندى.
مەملەكەت باسشىسى تاجىكستان پرەزيدەنتىنىڭ ساپارى ەكى ەل اراسىنداعى ەرەكشە قۇرمەت پەن شىنايى دوستىقتىڭ بەلگىسى ەكەنىن اتاپ ءوتتى.
قاسىم-جومارت توقاەۆ قازاقستان مەن تاجىكستاننىڭ ستراتەگيالىق ارىپتەستىك جانە وداقتاستىق قاتىناستارى جوعارى دەڭگەيدە دامىپ كەلە جاتقانىن ايتتى. سونداي-اق ەكىجاقتى ساۋدا اينالىمىنىڭ جىل سايىن 1 ميلليارد دوللاردان اساتىنىن جەتكىزدى. قازاقستان تاجىكستاننىڭ ءىرى ءۇش ساۋدا سەرىكتەسىنىڭ قاتارىندا.
كەزدەسۋدە مادەني-گۋمانيتارلىق بايلانىستارعا دا نازار اۋدارىلدى. اتاپ ايتقاندا، ەكى ەلدە مادەنيەت كۇندەرى وتكىزىلىپ، كورنەكتى تۇلعالارعا ارنالعان ەسكەرتكىشتەر اشىلعان. دۋشانبە قالاسىندا ابايدىڭ ءبيۋستى، ال استانادا يبن سينا ەسكەرتكىشى ورناتىلعان.
ءوز كەزەگىندە ەمومالي راحمون قازاقستاننىڭ تاجىكستاننىڭ جەتەكشى ساۋدا-ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. ونىڭ ايتۋىنشا، بيىلعى توعىز ايدا ەكى ەل اراسىنداعى تاۋار اينالىمى 1 ميلليارد دوللاردان اسىپ، وتكەن جىلدىڭ سايكەس كەزەڭىمەن سالىستىرعاندا 26 پايىزعا جۋىق وسكەن.
قازىر تاجىكستاندا قازاقستاندىق كاپيتالدىڭ قاتىسۋىمەن 130-دان استام كاسىپورىن تىركەلگەن. ال قازاقستاندا تاجىك تاراپىنىڭ قاتىسۋىمەن 580-نەن استام كاسىپورىن جۇمىس ىستەيدى.
كەلىسسوزدەر بارىسىندا كولىك جانە لوگيستيكا، ەنەرگەتيكا، اۋىل شارۋاشىلىعى، سۋ رەسۋرستارى، ونەركاسىپ جانە تسيفرلاندىرۋ سالالارىنداعى ىنتىماقتاستىقتى كەڭەيتۋ ماسەلەلەرى دە قارالدى.
سونداي-اق تاراپتار جوعارى دەڭگەيدە قول جەتكىزىلگەن كەلىسىمدەردى جۇيەلى تۇردە جۇزەگە اسىرۋدىڭ ماڭىزىن اتاپ ءوتتى.
