قازاق ۇلتتىق قىزدار پەداگوگيكالىق ۋنيۆەرسيتەتىنىڭ كىتاپحاناسىنا بيىل كۇردەلى جوندەۋ جاسالىپ، ۇلاعاتتى ۇستاز سەرالى قانيەۆتىڭ اتى بەرىلدى. جاڭارعان كىتاپحانانىڭ رەسمي اشىلۋىندا قر عىلىم جانە جوعارى ءبىلىم ءمينيسترى ساياسات نۇربەك ءسوز سويلەدى.
«شىن مانىندە بۇگىن – ايتۋلى كۇن. كەز كەلگەن ءبىلىم وشاعىنىڭ جۇرەگى – ول كىتاپحانا. ەڭ جوعارى ستاندارتتا جاسالعان، ەڭ مىقتى ەلەكتروندىق، تسيفرلىق پلاتفورمالارى بار بۇل عىلىمي كىتاپحانا ستۋدەنتتەر مەن وقىتۋشىلار، جالپى كىتاپسۇيەر قاۋىم ءۇشىن بىلىمدەرىن ارتتىرۋعا باعىتتالعان مىقتى ورتالىق بولارىنا سەنىمىم مول»، – دەدى قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك.
سەرالى قانيۇلى – قازاق ۇلتتىق قىزدار پەداگوگيكالىق ۋنيۆەرسيتەتىنىڭ دامۋىنا ۇلكەن ۇلەس قوسقان ارداقتى ۇستاز، بەلگىلى عالىم، فيزيكا-ماتەماتيكا عىلىمدارىنىڭ كانديداتى، دوتسەنت، قازاق سسر اعارتۋ ءىسىنىڭ ۇزدىگى، كسرو جوعارى مەكتەبىنىڭ ۇزدىگى، ەڭبەك ارداگەرى. 40 جىلعا جۋىق قازاق قىزدار پەداگوگيكالىق ينستيتۋتىندا قىزمەت ەتىپ، مىڭداعان شاكىرت تاربيەلەدى.
كىتاپحانانىڭ سالتاناتتى اشىلۋ راسىمىنە الماتى قالاسىنىڭ اكىمى ەربولات دوساەۆ، قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى – رەكتورى گۇلميرا قاناي جانە سەرالى قانيۇلىنىڭ جاقىن تۋىستارى دا قاتىستى.
الماتى قالاسىنىڭ اكىمى ەربولات دوساەۆ بۇل كىتاپحانا ءبىلىم مەن مادەنيەتتىڭ ناعىز ورتالىعى ەكەنىن اتاپ ءوتتى. ۇلاعاتتى ۇستازدىڭ كەلىنى جانات دەربيسالينا ۋنيۆەرسيتەت ۇجىمىنا العىسىن ءبىلدىردى:
«اكەمىزگە وسىنداي قۇرمەت كورسەتىلىپ جاتقانىنا وتە قۋانىشتىمىز. ول كىسىنىڭ ەسىمى ۋنيۆەرسيتەت قابىرعاسىندا، جۇرەگىمىزدە ماڭگىلىككە ساقتالادى».
ءىس-شارا اياسىندا قر عىلىم جانە جوعارى ءبىلىم ءمينيسترى ساياسات نۇربەك سەرالى قانيەۆتىڭ ۇلى بەرىك قانيەۆكە كىتاپحانانىڭ اشىلۋىنا زور ۇلەس قوسقانى ءۇشىن العىس حات تابىستادى. سونىمەن قاتار قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى-رەكتورى گۇلميرا قاناي دا العىسىن ايتىپ، ۋنيۆەرسيتەت كىتاپحاناسىنا سەرالى قانيەۆتىڭ اتى بەرىلگەنى وتە ماڭىزدى وقيعا ەكەنىن اتاپ ءوتتى.
ەربولات دوساەۆ قازىرگى ستۋدەنتتەرگە وقۋدا جانە كاسىپتە جوعارى ستاندارتتارعا ۇمتىلۋعا، ءوز ىسىنە ادال بولۋعا تىلەك ءبىلدىردى.
«بۇگىن قازاق ۇلتتىق قىزدار پەداگوگيكالىق ۋنيۆەرسيتەتى مەن جالپى قالامىز ءۇشىن اتاۋلى وقيعا - ءبىز ەڭ زاماناۋي تالاپتار مەن الەمدىك ستاندارتتارعا ساي كەلەتىن جاڭا كىتاپحانانى اشامىز. كىتاپحانا كورنەكتى عالىم جانە ۇستاز سەرالى قانيەۆتىڭ ەسىمىمەن اتالادى. ول 35 جىل بويى وسى ۋنيۆەرسيتەتتىڭ قابىرعاسىندا ەڭبەك ەتتى، ونىڭ بىلىمىمەن قاناتتانعان ستۋدەنتتەر ەلىمىزدىڭ ءار وڭىرىندە جەمىستى جۇمىس جاساۋدا، ءوز مانساپتارى مەن ومىرلەرىندە بيىك مەجەلەرگە قولجەتكىزۋدە»، - دەدى ءوز سوزىندە ەربولات دوساەۆ.
كىتاپحانا عيماراتىن رەكونسترۋكتسيالاۋ قازاقستاندىق جانە شەتەلدىك ساۋلەتشىلەردىڭ جوباسى بويىنشا جانە سەرالى قانيەۆتىڭ ۇلى – كاسىپكەر بەرىك قانيەۆتىڭ قاراجاتى ەسەبىنەن جۇرگىزىلدى. كىتاپحانا عيماراتى مودەرنيزاتسيالانعاننان سوڭ وندا ەرەكشە ءبىلىم بەرۋ قاجەتتىلىكتەرى بار ستۋدەنتتەرگە ارنالعان ارنايى كابينەت پايدا بولدى. عيماراتتى قايتا قۇرۋ جۇمىستارى جۇرگىزىلدى، بۇل كىتاپحانانىڭ جالپى اۋماعىن 2195 شارشى مەترگە، ال وتىراتىن ورىنداردىڭ سانىن 550-گە دەيىن ۇلعايتۋعا مۇمكىندىك بەردى. جاڭا كىتاپحانا عيماراتىندا مىنالار بار: 2 وقۋ زالى، كونفەرەنتس-زال، اكادەميالىق جازۋ ورتالىعى، وقۋ ايماعى، ستۋدەنتتەردىڭ توپتىق جۇمىس بولمەلەرى، 14 جەكە وقۋ كابيناسى، رەلاكساتسيا بولمەسى. كىتاپحانانىڭ كىتاپ قورى 1 ملن كىتاپتان اسادى.
