ءماجىلىس دەپۋتاتى ەرمۇرات باپي ۇكىمەتتىڭ Alphard كولىكتەرىنە بايلانىستى باستاماسىنا پىكىر ءبىلدىردى، دەپ حابارلايدى "ادىرنا" ۇلتتىق پورتالى.
جۋرناليستەر ءماجىلىس دەپۋتاتىنان «الفارد» ايدايتىندار، تاكسي جۇرگىزۋشىلەرى، «جۇمىسىمىزعا توسقاۋىل قويىپ جاتىر»، دەپ رەنىشىن ءبىلدىرىپ جاتىر. وڭ جاق ءرولدى كولىككە، سونىمەن قاتار وڭ جاقتان سول جاققا ءرولى اۋىسقان كولىكتەردى جۇرگىزۋگە تىيىم سالىنادى ەكەن. بۇعان نە ايتاسىز؟» دەپ سۇرادى.
ەرمۇرات باپي تاكسي قىزمەتى ەلدەگى جۇمىسسىزدىقتىڭ ءبىراز مولشەرىن جاۋىپ تۇرعانىن ايتادى.
- وسىعان بايلانىستى تاكسي جۇرگىزۋشىلەرىنىڭ نارازىلىعىنا قوسىلامىز. دەگەنمەن ەلدەگى، اسىرەسە كۇرە جولدارداعى اپاتتى جاعدايلاردىڭ بارلىعىن سارالاي كەلگەندە، بيلىك تاراپىنان قويىلعان تالاپتى دا ءتۇسىنۋىمىز كەرەك. مەنىڭ ويىمشا، بۇل باستاما ءالى جۇزەگە اسقان جوق. ەگەر ءبىز وڭ جاق رولگە تىيىم سالاتىن بولساق، قازاقستانعا كەلگەن اۆتوكولىكتىڭ، اسىرەسە ۇزاق جولعا جۇرەتىن ميكرواۆتوبۋستاردىڭ ۇشتەن ءبىر بولىگى وڭ جاق ءرولدى كولىك ەكەنىن نازاردان تىس قالدىرماۋىمىز كەرەك. بىراق، بيلىكتىڭ شەشىمىنە ورە تۇرە كەلىپ، قارسى شىعاتىنداي پىكىر جوق. ايتە دە، حالىقتىڭ ەڭ باستى جۇمىسسىزدىق جاعدايىنداعى، تابىس دەڭگەيىنىڭ تومەن ەكەنىن ەسكەرە وتىرىپ، ۇكىمەت پايىمدايدى دەپ ويلايمىن.
ءبىز بۇل ماسەلەنى تالقىلاۋ بارىسىندا «ءرولى وڭ جاقتان سول جاققا اۋىستىرىلعان كولىكتەردىڭ تەحنيكالىق جاعدايى قيىن» دەگەن ءسوز ايتىلدى. ونىڭ قانشالىقتى شىندىق نەمەسە جالعان اقپارات ەكەنىن بىلمەيمىن. بىراق سوڭعى كەزدەردەگى كۇرە جولدارداعى اپات سالدارىنا «وڭ جاقتاعى ءرول سول جاققا اۋىستىرىلعانى سەبەپ بولدى» دەگەن اقپارات بار. مەن تەحنيكالىق مامان بولماعاندىقتان ناقتى پىكىر ايتا المايمىن. بىراق بۇل تاقىرىپتا مامىلەلى شەشىم بولادى دەپ ويلايمىن. تەحنيكالىق باقىلاۋدى كۇشەيتۋ كەرەك الدە باسقالاي شەشىم قابىلداۋىمىز كەرەك. كەزىندە ءبىز وڭ جاقتان سول جاققا اۋىستىرۋعا رۇقسات بەردىك، وعان اقشا سالىپ، حالىق شىعىندالدى. ول ارزان دۇنيە ەمەس. ونىڭ بارلىعىن جاساتىپ العاننان كەيىن، «بۇعان تىيىم سالىنادى» دەپ ءۇزىلدى-كەسىلدى شەشىم قابىلداسا دۇرىس ەمەس دەپ ويلايمىن. بۇل ۆەدوموستۆومەن رەتتەلەدى. بۇل ەندى كەلەسى جىلدان باستاپ كۇشىنە ەنەدى دەگەن جوبا»، – دەدى ول.
