Májilis depýtaty Ermurat Bapı Úkimettiń Alphard kólikterine baılanysty bastamasyna pikir bildirdi, dep habarlaıdy "Adyrna" ulttyq portaly.
Jýrnalıster Májilis depýtatynan «Alfard» aıdaıtyndar, taksı júrgizýshileri, «jumysymyzǵa tosqaýyl qoıyp jatyr», dep renishin bildirip jatyr. Oń jaq róldi kólikke, sonymen qatar oń jaqtan sol jaqqa róli aýysqan kólikterdi júrgizýge tyıym salynady eken. Buǵan ne aıtasyz?» dep surady.
Ermurat Bapı taksı qyzmeti eldegi jumyssyzdyqtyń biraz mólsherin jaýyp turǵanyn aıtady.
- Osyǵan baılanysty taksı júrgizýshileriniń narazylyǵyna qosylamyz. Degenmen eldegi, ásirese kúre joldardaǵy apatty jaǵdaılardyń barlyǵyn saralaı kelgende, bılik tarapynan qoıylǵan talapty da túsinýimiz kerek. Meniń oıymsha, bul bastama áli júzege asqan joq. Eger biz oń jaq rólge tyıym salatyn bolsaq, Qazaqstanǵa kelgen avtokóliktiń, ásirese uzaq jolǵa júretin mıkroavtobýstardyń úshten bir bóligi oń jaq róldi kólik ekenin nazardan tys qaldyrmaýymyz kerek. Biraq, bıliktiń sheshimine óre túre kelip, qarsy shyǵatyndaı pikir joq. Áıte de, halyqtyń eń basty jumyssyzdyq jaǵdaıyndaǵy, tabys deńgeıiniń tómen ekenin eskere otyryp, Úkimet paıymdaıdy dep oılaımyn.
Biz bul máseleni talqylaý barysynda «Róli oń jaqtan sol jaqqa aýystyrylǵan kólikterdiń tehnıkalyq jaǵdaıy qıyn» degen sóz aıtyldy. Onyń qanshalyqty shyndyq nemese jalǵan aqparat ekenin bilmeımin. Biraq sońǵy kezderdegi kúre joldardaǵy apat saldaryna «Oń jaqtaǵy ról sol jaqqa aýystyrylǵany sebep boldy» degen aqparat bar. Men tehnıkalyq maman bolmaǵandyqtan naqty pikir aıta almaımyn. Biraq bul taqyrypta mámileli sheshim bolady dep oılaımyn. Tehnıkalyq baqylaýdy kúsheıtý kerek álde basqalaı sheshim qabyldaýymyz kerek. Kezinde biz oń jaqtan sol jaqqa aýystyrýǵa ruqsat berdik, oǵan aqsha salyp, halyq shyǵyndaldy. Ol arzan dúnıe emes. Onyń barlyǵyn jasatyp alǵannan keıin, «Buǵan tyıym salynady» dep úzildi-kesildi sheshim qabyldasa durys emes dep oılaımyn. Bul vedomostvomen retteledi. Bul endi kelesi jyldan bastap kúshine enedi degen joba», – dedi ol.
