ءماجىلىس «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا تۇزەتۋلەردى قابىلدادى، دەپ حابارلايدى «ادىرنا» ءتىلشىسى.
زاڭ اياسىندا «AL-FARABI»، «QOJA AHMET YASAUI» جانە «مەيىرىم» وردەندەرىن تاعايىنداۋ، سونداي-اق وردەندەرمەن جانە مەدالدارمەن ماراپاتتاۋ ءتارتىبىن وزگەرتۋ جونىندەگى نورمالار قاراستىرىلعان.
«مەيىرىم» وردەنى مەتسەناتتىق جانە فيلانتروپيالىق قىزمەتى، سونداي-اق قايىرىمدىلىق سالاسىنا قوسقان ەلەۋلى ۇلەسى ءۇشىن تابىستالادى. «QOJA AHMET YASAUI» تانىمال قازاقستاندىق جانە شەتەلدىك عالىمدارعا، مەملەكەت جانە قوعام قايراتكەرلەرىنە بەرىلسە، «AL-FARABI» وردەنى ءبىلىم مەن عىلىم، مادەنيەت جانە رۋحاني ءومىر سالالارىندا جەتىستىككە جەتكەن ازاماتتارعا ارنالعان.
زاڭ جوباسى ەندى سەناتتىڭ قاراۋىنا جىبەرىلدى.
ناۋرىز ايىندا پرەزيدەنت قاسىم-جومارت توقاەۆ جاقىن ۋاقىتتا «QOJA AHMET YASAUI» وردەنىن مەملەكەتتىك ناگرادالار تىزىمىنە ەنگىزۋ تۋرالى جارلىققا قول قوياتىنىن مالىمدەگەن بولاتىن. ال ساۋىردە مەملەكەت باسشىسى «AL-FARABI» وردەنىن تاعايىنداۋدى دا ۇسىنعان.
ايتا كەتەيىك، وردەندەر العاش رەت بيىل رەسپۋبليكا كۇنى قارساڭىندا تابىستالماق.
