ناۋرىز ايىندا «مەركۋر تاۋن» تۇرعىن ءۇي كەشەنىنىڭ كۇزەتشىسىن بىرنەشە رەت كولىكپەن باسىپ كەتكەن بۇرىنعى دەپۋتاتتىڭ ۇلىنا قاتىستى ءىس تۋرالى الماتى قالاسى پوليتسيا دەپارتامەنتى مالىمدەمە جاسادى، دەپ حابارلايدى «ادىرنا» ۇلتتىق پورتالى.
«كۇدىكتى دەرەۋ قاماۋعا الىندى. بۇرىن سوتقا دەيىنگى تەرگەۋ مەرزىمى سوت-پسيحياتريالىق ساراپتاما جۇرگىزىلۋىنە بايلانىستى توقتاتىلعان بولاتىن. قازىرگى ۋاقىتتا ءىس قايتا جاندانىپ، ءتيىستى ساراپتامالار تاعايىندالدى. تەرگەۋ اياقتالعاننان كەيىن قىلمىستىق ءىس ماتەريالدارى سوتقا جىبەرىلەدى»، – دەپ حابارلادى پوليتسيا وكىلدەرى.
بۇعان دەيىن الماتى پروكۋراتۋراسى كۇدىكتىنىڭ ۋاقىتشا پسيحيكالىق اۋىتقۋى نەمەسە باسقا دا اۋىر سىرقاتقا بايلانىستى سوتقا دەيىنگى تەرگەۋ مەرزىمىن توقتاتۋ تۋرالى شەشىم قابىلدانعانىن حابارلاعان بولاتىن.
ەستەرىڭىزگە سالا كەتەيىك، «مەركۋر تاۋن» تۇرعىن ءۇي كەشەنىنىڭ تۇرعىنىنىڭ كۇزەتشىنى بىرنەشە رەت جول تالعامايتىن كولىكپەن باسىپ، كەيىن ونىڭ باسىنان سەكىرگەن قاتىگەز ارەكەتى ۆيدەوعا ءتۇسىپ قالعان ەدى. وقيعا ناۋرىزدىڭ 28-ىنەن 29-ىنا اۋعان ءتۇنى بولعان. كۇزەتشى اۋىر حالدە اۋرۋحاناعا جەتكىزىلگەنىمەن، سول جەردە كوز جۇمدى.
كەيىننەن كۇزەتشىنى ولتىرگەن ازاماتتىڭ تۋىستارى مارقۇمنىڭ وتباسىنا اقشا ۇسىنعانى بەلگىلى بولعان ەدى.
