Apellıaııalyq sot Atyraý oblysy Maqat aýdanynyń burynǵy ákimi Rınat Ibragımovqa qatysty birinshi satydaǵy sot úkimin ózgertti. Bul týraly oblystyq sot málimdedi, dep habarlaıdy “Adyrna” ulttyq portaly.
«Atyraý qalasynyń №2 soty Ibragımovti materıaldyq táýeldilikte bolǵan adamǵa qatysty densaýlyqqa qasaqana aýyrlyǵy ortasha zııan keltirgeni úshin kináli dep tanyp (QK-niń 107-baby 2-bóliginiń 3-tarmaǵy), 2 jyl merzimge bas bostandyǵyn shektedi. Jábirlenýshiniń moraldyq shyǵyn óndirý týraly azamattyq talap qoıýy ishinara qanaǵattandyryldy: sottalýshydan 2 mln teńge moraldyq zııan ótemaqysy óndirildi», - delingen oblystyq sot habarlamasynda.
Sot alqasy is materıaldaryn zerdelep, Ibragımovtiń qylmys jasaýdaǵy kinási jábirlenýshiniń jaýaptarymen, sot-dárigerlik saraptama qortyndysymen dáleldendi degen tujyrymǵa keldi.
Alqa «kináli adamǵa kórineý belgili materıaldyq jaǵynan táýeldi adamǵa qatysty» saralaý belgisi durys taǵylmaǵan dep sheshti. Jábirlenýshiniń sottalǵanǵa materıaldyq táýeldiligi týraly dálel usynylmady. Jábirlenýshiniń kásipkerlik qyzmetti júzege asyrǵany, onyń shotyna aqsha túskeni týraly qujattar usynyldy.
Osyǵan baılanysty, Ibragımovtiń áreketi QK-tiń 107-babynyń 1-bóligine qaıta saralandy. Oǵan 700 aılyq eseptik kórsetkish mólsherinde aıyppul jazasy taǵaıyndaldy (2 415 000 teńge).
Eske salsaq, Ibragımovke qatysty uryp-soǵý týraly qylmystyq is osy jyldyń aqpan aıynda sotqa berildi, biraq ol ákim qyzmetin jalǵastyra bergen edi. Ol aýdan basshysy qyzmetinen mamyr aıynyń sońynda ǵana óz erkimen ketken. Maýsymda sot úkim shyǵarǵan bolatyn.
