ءانشى ەرنار ايدار جول قوزعالىسى ەرەجەسىن بۇزعان ءساتىن ۆيدەوعا ءتۇسىرىپ، الەۋمەتتىك جەلىگە جاريالاعان ەدى. كادرلاردا كولىكتىڭ قوس تۇتاس سىزىقتى كەسىپ ءوتىپ، قارسى باعىتتاعى جولاققا شىققانى بايقالادى. الايدا وقيعادان كەيىن ول جۇرگىزۋشى كۋالىگىنەن ايىرىلماي، تەك اكىمشىلىك ايىپپۇلمەن شەكتەلدى، دەپ حابارلايدى “ادىرنا”.
پوليتسيا انشىگە قاتىستى ءۇش اكىمشىلىك حاتتاما تولتىرعانىن حابارلادى. ءىىم ءباسپاسوز قىزمەتىنىڭ مالىمەتىنشە، وعان مىنا باپتار بويىنشا ايىپ تاعىلعان:
- 615-باپ، 1-بولىك - جاياۋ جۇرگىنشىلەر جانە وزگە دە جول قوزعالىسىنا قاتىسۋشىلاردىڭ جول ەرەجەسى تالاپتارىن ورىنداماۋى;
- 597-باپ، 1-بولىك - كولىكتى توقتاتۋ نەمەسە قويۋ قاعيدالارىن بۇزۋ (ونىڭ ىشىندە ەلەكتر قۋاتتاۋ ستانتسياسى بار ورىنداردا);
- 601-باپ، 1-بولىك - جول بەلگىلەرى نەمەسە جولاق (رازمەتكا) تالاپتارىن ساقتاماۋ.
وسى شەشىم كوپشىلىكتىڭ كۇمانىن تۋدىردى. وقىرمانداردىڭ ءبىر بولىگى مۇنداي ارەكەت ءۇشىن جۇرگىزۋشى كۋالىگىنەن ايىرۋ قاراستىرىلعان دەپ ەسەپتەيدى.
ەسكە سالايىق، اقبتك-ءنىڭ 596-بابى 3-بولىگىنە سايكەس، ەرەجە بويىنشا تىيىم سالىنعان جاعدايدا قارسى جولاققا شىعۋ 6 ايعا جۇرگىزۋشى قۇقىعىنان ايىرۋعا اكەلۋى مۇمكىن.
Tengrinews.kz ءىىم-نەن "نەگە ەرنار ايدارعا 596-باپتىڭ 3-بولىگى قولدانىلمادى؟" دەگەن ساۋال جولدانعان. ۆەدومستۆو مالىمەتىنشە، ماتەريالداردى قاراۋ بارىسىندا بۇل باپقا ساي قۇقىقبۇزۋشىلىق بەلگىلەرى انىقتالماعان.
"قارسى قوزعالىس جولاعىنا شىعۋ دەرەگى نەمەسە وسى باپقا كىرەتىن باسقا دا بۇزۋشىلىقتار تىركەلمەدى", - دەپ ءتۇسىندىردى ءىىم.
جالپى ايىپپۇل سوماسى ناقتى ايتىلمادى. دەگەنمەن حاتتاما قاي باپتارمەن تولتىرىلعانى بەلگىلى بولعاندىقتان، ايىپپۇلدى شامالاپ ەسەپتەۋگە بولادى:
- توقتاۋ/تۇراق ەرەجەسىن بۇزۋ - 5 اەك;
- جول بەلگىلەرى نەمەسە رازمەتكا تالاپتارىن ساقتاماۋ - 3 اەك;
- وزگە قاتىسۋشىلاردىڭ جول ەرەجەسى تالاپتارىن ورىنداماۋى - 2 اەك.
بارلىعى: 10 اەك. 2026 جىلى بۇل 43 250 تەڭگە.
