پاريجدە فرانتسيا پرەزيدەنتىنىڭ جۇبايى بريدجيت ماكرونعا قاتىستى ينتەرنەتتەگى قورلاۋ ءىسى بويىنشا سوت پروتسەسى باستالدى، دەپ حابارلايدى «ادىرنا» ءتىلشىسى.
ون ايىپتالۋشى «بريجيت ماكرون ەر ادام بولىپ دۇنيەگە كەلگەن» دەگەن جالعان اقپارات تاراتتى دەپ ايىپتالىپ وتىر. سونداي-اق ولار 72 جاستاعى بريدجيت پەن 47 جاستاعى ەممانۋەل ماكروننىڭ اراسىنداعى 24 جىلدىق جاس ايىرماشىلىعىنا بايلانىستى ايتىلعان جالا سوزدەر ءۇشىن دە جاۋاپقا تارتىلىپ جاتىر.
بريجيت ماكروننىڭ ادۆوكاتى ونىڭ العاشقى سوت وتىرىسىنا قاتىسپاعانىن جانە بولاشاقتا دا سوتقا كەلۋدى جوسپارلامايتىنىن مالىمدەدى. ال سەيسەنبى كۇنى ونىڭ قىزى تيففاني وزە كۋالىك بەرۋى مۇمكىن.
ايىپتالۋشىلاردىڭ اراسىندا سايلانبالى قىزمەت اتقاراتىن شەنەۋنىك، گالەرەيا يەسى، مۇعالىم مەن بالگەرلەر بار.
سونىمەن قاتار ءوزىن تاۋەلسىز جۋرناليست دەپ اتايتىن ناتاچا رەي ەسىمدى ايىپتالۋشى دا بار. ول بۇعان دەيىن دە بريجيت ماكرونعا جالا جاپتى دەگەن ايىپپەن سوتتالعان بولاتىن.
ەسكە سالايىق، شىلدە ايىندا فرانتسيا پرەزيدەنتى ەممانۋەل ماكرون مەن زايىبى بريجيت ماكرون بلوگەر كەنديس وۋەنسكە قارسى جالا جابۋ تۋرالى سوتقا ارىز بەرگەن ەدى.
