20 قازان كۇنى الماتى قالاسىندا اۋعان تاۋارلارىنىڭ كورمەسى اشىلدى، دەپ حابارلايدى «ادىرنا» ءتىلشىسى.
قولدان توقىلعان كىلەمدەر، جەمىستەر مەن كوكونىستەر، جاڭعاقتار، شافران شايى، انتيكۆاريات، قۇرىلىس ماتەريالدارى، اسىل تاستار، كونديتەرلىك ونىمدەر جانە باسقا دا كوپتەگەن ءداستۇرلى اۋعان تاۋارلارى اتاكەنت-ەكسپو كورمە كەشەنىندە ۇسىنىلدى. ودان بولەك، كورمەدە قىلىش، تاپانشا مەن قانجار دا ساتىلىپ جاتىر.
«قارۋلاردى قازاقستانعا اكەلۋدە قيىندىقتار بولعان جوق. بىزگە اۋعانستان ۇكىمەتى كومەكتەستى»،—دەدى كاسىپكەرلەردىڭ ءبىرى.
بۇل قازاقستاندا وتكىزىلىپ جاتقان ءداستۇرلى اۋعان ونىمدەرىنىڭ ەكىنشى كورمەسى، ونى ساۋدا جانە ينتەگراتسيا مينيسترلىگى مەن Qaztrade ساۋدا ساياساتىن دامىتۋ ورتالىعىنىڭ قولداۋىمەن ۇيىمداستىردى. ءىس-شارانىڭ اشىلۋىنا ۆيتسە-پرەمەر سەرىك جۇمانعارين مەن اۋعانستاننىڭ ساۋدا جانە ونەركاسىپ ءمينيسترى نۋريددين ازيزي قاتىستى.
«قازاقستان اۋعانستاندى وڭتۇستىك جانە ورتالىق ازياداعى ماڭىزدى ءارى اجىراماس سەرىكتەس رەتىندە قاراستىرادى. عالامدىق داعدارىستارعا قاراماستان، ەكى ەل اراسىنداعى ساۋدا-ەكونوميكالىق ىنتىماقتاستىق دامىپ كەلەدى. قازاقستان ءوز ءونىمىن اۋعان نارىعىنا شىعارۋمەن عانا شەكتەلمەي، اۋعان تاۋارلارىنىڭ دا قازاقستاندىق نارىققا شىعۋىنا جاردەمدەسىپ كەلەدى»، – دەپ اتاپ ءوتتى جۇمانعارين.
كورمەدە ۆيتسە-پرەمەر اۋعان حالاتىن كيىپ كوردى. سونداي-اق قازاقستان ۇكىمەتىنە ساعات تارتۋ ەتىلدى.
ايتا كەتەيىك، الماتىداعى ءداستۇرلى اۋعان تاۋارلارىنىڭ كورمەسى 2024 جىلدىڭ 20-22 قازان ارالىعىندا وتەدى. 22 قازان كۇنى قازاقستان-اۋعان بيزنەس-فورۋمى وتەدى، ونىڭ اياسىندا قاتىسۋشىلار B2B كەزدەسۋلەرىندە ىنتىماقتاستىقتىڭ جاڭا مۇمكىندىكتەرىن تالقىلايدى.
