قازاقستاننىڭ بريكس-تەن باس تارتۋىنا قاتىستى جاعداي ناقتىلاۋدى قاجەت ەتەدى. بۇل تۋرالى رەسەي سىرتقى ىستەر ءمينيسترى سەرگەي لاۆروۆ «ارگۋمەنتى ي فاكتى» گازەتىنە بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
ساياساتكەر قازاقستاننىڭ ەقىۇ، تمد، ۇقشۇ، شىۇ سىندى كوپتەگەن ۇيىمعا مۇشە ەكەنىن جانە تۇركى مەملەكەتتەرى ۇيىمىنىڭ بەلسەندى مۇشەسى بولىپ وتىرعانىن اتاپ ءوتتى.
«تۇركى مەملەكەتتەر ۇيىمى ورتالىق ازياداعى وداقتاستارىمىز بەن ستراتەگيالىق سەرىكتەستەرىمىزگە ۇلكەن كوڭىل بولەدى. مۇنىڭ ەشقايسىسى قازاقستاننىڭ نەمەسە ورتالىق ازيانىڭ باسقا ەلدەرىنىڭ امبەباپ قۇرىلىمى بولىپ سانالاتىن، بىراق قازىر داعدارىستى باستان كەشىرىپ وتىرعان بىرىككەن ۇلتتار ۇيىمىنا بەلسەندى قاتىسۋىنا ەش كەدەرگى كەلتىرىپ وتىرعان جوق. ءبىزدىڭ وڭتۇستىك كورشىلەرىمىز، ۇقشۇ-داعى، ەاەو-داعى وداقتاستارىمىز الداعى ۋاقىتتا بريكس-پەن جاقىنداسۋدىڭ تىكەلەي پايداسىنا كوز جەتكىزەتىن سياقتى. ۇيىمعا مۇشە بولۋ مىندەتتى ەمەس، بىراق ناقتى جوبالار بويىنشا بىرلەسىپ جۇمىس ىستەۋگە نەگىز بار. بۇل ءبارىمىزدىڭ مۇددەمىزگە ساي دەپ ويلايمىن»،- دەدى ول.
بۇعان دەيىن پرەزيدەنتتىڭ ءباسپاسوز حاتشىسى بەرىك ءۋالي قاسىم-جومارت توقاەۆقا ۇيىمعا كىرۋ تۋرالى ۇسىنىستار تۇسكەنىن ايتقان ەدى.
«بۇل ۇسىنىستاردى مەملەكەت باسشىسى مۇقيات قاراستىرىپ، ونىڭ تاپسىرماسىمەن ءتيىستى ۆەدومستۆولار قازاقستاننىڭ ۇلتتىق مۇددەلەرى تۇرعىسىنان تالداپ جاتىر. سونىمەن بىرگە قازىرگى ۋاقىتتا جانە جاقىن بولاشاقتا قازاقستان بريكس-كە مۇشەلىككە ءوتىنىم بەرۋدەن باس تارتادى»،—دەپ ءتۇسىندىردى ول.
