الماتى وبلىسى پوليتسيا دەپارتامەنتىنىڭ جاڭا باسشىسى تاعايىندالدى، دەپ حابارلايدى «ادىرنا» ۇلتتىق پورتالى ءىىم ءباسپاسوز قىزمەتىنە سىلتەمە جاساپ.
ىشكى ىستەر ءمينيسترى ەرجان سادەنوۆ الماتى وبلىسى پوليتسيا دەپارتامەنتىنىڭ باسشىلىعىمەن وتكەن جەدەل كەڭەستە پوليتسيا دەپارتامەنتىنىڭ جاڭادان تاعايىندالعان باسشىسىن جەكە قۇرامعا تانىستىردى.
«قازاقستان رەسپۋبليكاسى پرەزيدەنتىنىڭ اكىمشىلىگىمەن كەلىسە وتىرىپ، ىشكى ىستەر ءمينيسترىنىڭ بۇيرىعىمەن مەيرام ابىكەەۆ وبلىستىق پوليتسيا دەپارتامەنتىنىڭ باستىعى بولىپ تاعايىندالدى»، - دەلىنگەن ءىىم حابارلاماسىندا.
بۇعان دەيىن بۇل قىزمەتتى اتقارعان باۋىرجان الەنوۆ 7 قازاندا ول ىشكى ىستەر ءمينيسترىنىڭ ءبىرىنشى ورىنباسارى بولىپ تاعايىندالدى.
ىشكى ىستەر مينيسترلىگىنىڭ باسشىسى جەدەل-تەرگەۋ توبىنان تالعار اۋدانىنداعى كامەلەتكە تولماعان بالانىڭ ولىمىنە قاتىستى ءىستى تەرگەۋ بارىسىن بولەك تىڭدادى. قورىتىندىسى بويىنشا ناقتى تاپسىرمالار بەرىلدى.
پوليتسيا پولكوۆنيگى مەيرام ابىكەەۆ بۇعان دەيىن سولتۇستىك قازاقستان وبلىسى پوليتسيا دەپارتامەنتى باستىعىنىڭ ورىنباسارى بولعان.
وبلىستىق دەپارتامەنت باستىعىنىڭ ءبىرىنشى ورىنباسارى بولىپ باعدات ءاشىموۆ تاعايىندالدى.
اكىمنىڭ ءبىرىنشى ورىنباسارى نۇرلان ءابدىراحىموۆ، ارداگەرلەر كەڭەسىنىڭ توراعاسى جۇماعالي بۋەمباەۆ جانە قوعامدىق كەڭەستىڭ توراعاسى ەسكەلدى قاسىموۆ مەيرام ابىكەەۆتى جاقسى بىلەتىندەرىن ايتىپ، مينيسترگە ونى قىزمەتكە تاعايىنداعانى ءۇشىن العىسىن ءبىلدىردى.
جەدەل كەڭەستىڭ قورىتىندىسى بويىنشا مينيستر وڭىردەگى قۇقىقتىق ءتارتىپتى قورعاۋ جانە قوعامدىق قاۋىپسىزدىكتى قامتاماسىز ەتۋ جونىندە ناقتى تاپسىرمالار بەردى.
