تۋريزم جانە سپورت ءمينيسترى ەربول مىرزابوسىنوۆ فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق تىلىنە قاتىستى ايتقانىن ەندى «ءساتسىز ءازىل» دەپ باعالادى. بىراق ول قازاقستاندىقتاردى تولەرانتتى بولۋعا جانە رەسەيدەن كەلگەن باپكەردى ەڭبەگىنىڭ ناتيجەسىنە قاراپ باعالاۋعا شاقىردى.
«ستانيسلاۆ چەرچەسوۆتىڭ «فرانتسۋز ءتىلى» تۋرالى ءازىلى ءساتسىز بولدى. مۇنى قازاقستان فۋتبول فەدەراتسياسى دا، باپكەردىڭ ءوزى دە جاقسى تۇسىنەدى. دەگەنمەن، چەرچەسوۆتىڭ مىندەتى – ءبىزدىڭ كوماندانى جاڭا دەڭگەيگە كوتەرۋ. ونى ەڭ الدىمەن جۇمىسىنا قاراپ باعالايىق»، - دەپ جازدى تۋريزم جانە سپورت مينيسترلىگىنىڭ باسشىسى Facebook پاراقشاسىندا.
مىرزابوسىنوۆ قازاقتاردىڭ ەجەلدەن قوناقجاي، ءتوزىمدى حالىق بولعانىن ەسكە سالدى.
«سوندىقتان، مەن جاعدايدى ۋشىقتىرماۋعا جانە بىزگە ءتان جومارتتىعىمىز بەن جايباراقاتتىعىمىزدى كورسەتۋگە شاقىرامىن. كەز كەلگەن ماسەلەنى تۇسىنىستىكپەن، بايسالدىلىقپەن شەشۋگە قابىلەتتى دانا، تولەرانتتى، وركەنيەتتى قوعام ەكەنىمىزدى كورسەتەيىك. ستانيسلاۆ چەرچەسوۆ – حالىقارالىق تاجىريبەسى بار جانە فۋتبولدا 20 جىلدىق مانسابى بار تانىمال مامان. ول قازاقستاندىق جانكۇيەرلەردىڭ سەنىمىن اقتاپ، ۇلتتىق قۇرامانى قيىن جاعدايدان جاڭا دەڭگەيگە الىپ شىعادى دەپ سەنەمىن»، - دەپ تۇيىندەدى ءسوزىن سپورت ءمينيسترى.
ەستەرىڭىزگە سالا كەتەيىك، ۇلتتار ليگاسى اياسىندا سلوۆەنيامەن وتكەن ماچتان كەيىنگى ءباسپاسوز كونفەرەنتسياسىندا مارقۇم امانگەلدى سەيىتحاننىڭ ۇلى بەگاسىل سەيىتحان ستانيسلاۆ چەرچەسوۆكە قازاق تىلىندە سۇراق قويىپ باستايدى. باس باپكەر ءجۋرناليستىڭ ۇستىنە فرانتسيانىڭ پسج كلۋبىنىڭ جەيدەسىن كيىپ العانىن ازىلگە اينالدىرعىسى كەلدى مە، ايتەۋىر «سەن قاي تىلدە سويلەپ تۇرسىڭ – فرانتسۋزشا ما؟» دەپ ءسوزىن ءبولدى. سونان سوڭ باسىن يزەپ، سۇراعىن جالعاستىرۋعا بولاتىنىن اڭعارتتى.
وسىدان كەيىن ەلدە نارازىلىق تولقىنى كوتەرىلدى. ەل پارلامەنتىنىڭ دەپۋتاتتارى جاعدايعا توقتالىپ، قازاقستان رەسپۋبليكاسىنا جۇمىس ىستەۋگە كەلگەندەر قازاق ءتىلىن قۇرمەتتەۋ كەرەكتىگىن ايتتى. ال قازاقستاندىق «قايرات» كلۋبىندا بىرنەشە جىل ويناعان رەسەيلىك فۋتبولشى اندرەي ارشاۆين چەرچەسوۆتىڭ «ازىلىندە» استارلى ءماتىن جوق ەكەنىن ايتتى.
سپورت مينيسترلىگى ءاۋ باستا بۇل وقيعاعا رەاكتسيا ءبىلدىرىپ، رەسەي باپكەرىنىڭ "سوزدەرى كونتەكستەن جۇلىپ الىندى جانە چەرچەسوۆتىڭ ءسوزى جاي اتموسفەرانى سەيىلتۋ ءۇشىن ايتىلعان" دەپ مالىمدەگەن فۋتبول فەدەراتسياسىنان تۇسىنىكتەمە تالاپ ەتتى. ناتيجەسىندە باپكەرگە ايىپپۇل سالىندى.
