قازاق ءتىلىن كەمسىتكەن قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ سىنعا قالدى. تۋريزم جانە سپورت مينيسترلىگى قازاقستان فۋتبول فەدەراتسياسىنان تۇسىنىكتەمە بەرۋدى تالاپ ەتتى، دەپ حابارلايدى “ادىرنا” ۇلتتىق پورتالى.
قازاقستان مەن سلوۆەنيا ماتچىنان سوڭ وتكەن ءباسپاسوز كونفەرەنتسياسىندا تىلشىلەردىڭ ءبىرى قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆكە قازاق تىلىندە سۇراق قويامىن دەپ، مازاققا قالدى. باپكەر تىلشىگە «سەن فرانتسۋز تىلىندە سۇراق قويىپ جاتسىڭ با؟» دەپ كەمسىتىپ، فرانتسۋزشا سويلەي باستادى. باپكەردىڭ ارەكەتى قوعام تاراپىنان نارازىلىق تۋعىزدى. مينيسترلىك بۇل جاعدايعا بەيجاي قاراماي، قازاقستان فۋتبول فەدەراتسياسىنا رەسمي حات جولدادى.
حاتتا مەملەكەتتىك ءتىلدىڭ مارتەبەسى قازاقستان رەسپۋبليكاسىنىڭ كونستيتۋتسياسى مەن «ءتىل تۋرالى» زاڭىنا سايكەس جوعارى تۇراتىنى جانە وعان بارلىق ازاماتتىڭ قۇرمەت كورسەتۋى كەرەكتىگى ايتىلعان. سونىمەن قاتار فەدەراتسيادان وسى وقيعاعا تۇسىنىكتەمە بەرۋ جانە س.چەرچەسوۆپەن مەملەكەتتىك تىلگە قۇرمەت كورسەتۋ تۋرالى ءتۇسىندىرۋ جۇمىستارىن جۇرگىزۋ تالاپ ەتىلدى.
«ءبىز مۇنداي جاعدايلاردىڭ قايتالانباۋىن قامتاماسىز ەتۋ ءۇشىن فەدەراتسيا تاراپىنان ءتيىستى شارالار قولدانىلۋى كەرەك دەپ سانايمىز.
سونداي-اق قازاقستان فۋتبول فەدەراتسياسى مينيسترلىككە باعىنىستى ۇيىم ەمەس ەكەنىن، تيىسىنشە ونىڭ ىشكى ماسەلەلەرىنە ارالاسا المايتىنىن، دەگەنمەن قازاقستانداعى سپورت ساياساتىن قالىپتاستىرىپ، جۇرگىزەتىن ۆەدومستۆو بولعاندىقتان، تۇسىنىكتەمە تالاپ ەتۋگە قۇقىلى ەكەنىن قاپەرگە سالامىز»، دەلىنگەن حاتتا.
مينيسترلىك وسى جازبا ارقىلى ەلىمىزدەگى وزگە فەدەراتسيالاردى دا مەملەكەتتىك رامىزدەرگە، ۇلتتىق قۇندىلىقتارعا قۇرمەتپەن قاراۋعا جانە ولارعا قاتىستى ورىنسىز قالجىڭنىڭ الدىن الۋعا شاقىردى.
