ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ تالعار اۋدانى اكىمدىگىنىڭ اپپارات باسشىسى اسلان قاسىمباەۆتىڭ جۇمىسقا ورنالاسۋىنا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
«تالعار اۋدانىنىڭ اكىمدىگى اپپاراتىندا جۇمىس ىستەپ جاتقان ادام مەملەكەتتىك قىزمەتكە تۇرار الدىندا بىرنەشە تەكسەرىستەن وتەدى. بىزدە ارنايى جانە وزگە تەكسەرىستەردەن وتەدى. ەگەر بۇل جەردە قانداي دا ءبىر كەدەرگىلەر بولسا، ول ادام مەملەكەتتىك قىزمەتكە تۇرا المايتىن ەدى»، - دەيدى باۋىرجان الەنوۆ.
ال الماتى وبلىسىنىڭ پروكۋرورى بەرىك اداموۆتىڭ ايتۋىنشا، ەڭبەك كودەكسى بويىنشا ەگەر تۋعان اعاڭ سوتتى بولسا جۇمىسقا ورنالاسۋعا كەدەرگى كەلمەيدى.
«بۇل جاعدايعا قاتىستى ايتاتىن بولساق، ول جۇمىسقا ورنالاسقاننان كەيىن قانداي دا ءبىر تۋىسى قىلمىس جاساۋى مۇمكىن. بۇل مەملەكەتتىك قىزمەتكەر جۇمىستان شىعۋى كەرەك دەگەندى بىلدىرمەيدى. ال «حۋتور» قىلمىستىق توبى جايلى ايتاتىن بولساق، تالعار اۋدانىندا «حۋتورسكي» دەگەن اۋدان بار. مۇمكىن، سول اۋدان تۇرعىندارىن حۋتوردان، حۋتورلىق دەۋى مۇمكىن. ال بۇگىندە ونداي قىلمىستىق توپ جوق»، - دەيدى اداموۆ.
وسىعان دەيىن تالعار قالاسىندا 16 جاسار شەرزات بولاتتىڭ ولىمىنەن كەيىن، الەۋمەتتىك جەلىلەردە جانە كەيبىر اقپارات قۇرالدارىندا تالعار اۋدانى اكىمدىگى اپپارات باسشىسىنىڭ وسى قىلمىستى جاساعاندارمەن بايلانىسى تۋرالى اقپارات تارادى. اۋداننىڭ اپپارات باسشىسى اسلان قاسىمباەۆ «حۋتورلىق حاسان» دەگەن اتپەن تانىمال قىلمىستىق تۇلعانىڭ تۋعان باۋىرى ەكەنى جازىلىپ جاتىر. ال ولاردىڭ تاعى ءبىر اعايىنى ءىستى بولعانى بەلگىلى بولعان.
