Ishki ister mınıstriniń birinshi orynbasary Baýyrjan Álenov Talǵar aýdany ákimdiginiń apparat basshysy Aslan Qasymbaevtyń jumysqa ornalasýyna qatysty pikir bildirdi, dep habarlaıdy “Adyrna” ulttyq portaly.
«Talǵar aýdanynyń ákimdigi apparatynda jumys istep jatqan adam memlekettik qyzmetke turar aldynda birneshe tekseristen ótedi. Bizde arnaıy jáne ózge tekseristerden ótedi. Eger bul jerde qandaı da bir kedergiler bolsa, ol adam memlekettik qyzmetke tura almaıtyn edi», - deıdi Baýyrjan Álenov.
Al Almaty oblysynyń prokýrory Berik Adamovtyń aıtýynsha, Eńbek kodeksi boıynsha eger týǵan aǵań sotty bolsa jumysqa ornalasýǵa kedergi kelmeıdi.
«Bul jaǵdaıǵa qatysty aıtatyn bolsaq, ol jumysqa ornalasqannan keıin qandaı da bir týysy qylmys jasaýy múmkin. Bul memlekettik qyzmetker jumystan shyǵýy kerek degendi bildirmeıdi. Al «Hýtor» qylmystyq toby jaıly aıtatyn bolsaq, Talǵar aýdanynda «Hýtorskıı» degen aýdan bar. Múmkin, sol aýdan turǵyndaryn Hýtordan, hýtorlyq deýi múmkin. Al búginde ondaı qylmystyq top joq», - deıdi Adamov.
Osyǵan deıin Talǵar qalasynda 16 jasar Sherzat Bolattyń óliminen keıin, áleýmettik jelilerde jáne keıbir aqparat quraldarynda Talǵar aýdany ákimdigi apparat basshysynyń osy qylmysty jasaǵandarmen baılanysy týraly aqparat tarady. Aýdannyń apparat basshysy Aslan Qasymbaev «hýtorlyq Hasan» degen atpen tanymal qylmystyq tulǵanyń týǵan baýyry ekeni jazylyp jatyr. Al olardyń taǵy bir aǵaıyny isti bolǵany belgili bolǵan.
