قاراعاندى وبلىسىندا جۇك اۆتوكولىكتەرىن تىركەۋ ىسىندەگى الاياقتىق انىقتالدى. قارجىلىق مونيتورينگ اگەنتتىگى سوتقا دەيىنگى تەرگەۋ جۇرگىزىپ جاتىر، دەپ حابارلايدى “ادىرنا” ۇلتتىق پورتالى.
«حقكو قىزمەتكەرلەرى كولىك قۇرالىن تىركەۋ كەزىندەگى الىمدى جانە ۋتيليزاتسيا تولەمدەرىن تولەمەۋ ءۇشىن اقپاراتتىق جۇيەگە جۇك كولىكتەرىنىڭ VIN-كودتارى بويىنشا جالعان دەرەكتەر ەنگىزگەن»، - دەدى ۆەدومستۆو.
باس-اياعى 33 جۇك كولىگى زاڭسىز تىركەلگەن. سول سەبەپتى مەملەكەت بيۋدجەتىنە 315 ملن تەڭگە شىعىن كەلگەن.
مامانداندىرىلعان حقكو بۇرىنعى باسشىسى مەن ورىنباسارى قىلمىستىق سحەمانى ۇيىمداستىردى دەگەن كۇدىككە ءىلىندى. ەكەۋى دە سوت سانكتسياسىمەن قاماۋعا الىندى. ولاردىڭ 42 ملن تەڭگە تۇراتىن مۇلكى بۇعاتتالدى.
