تالعار اۋدانى رىسقۇلوۆ اۋىلىنىڭ (بۇرىنعى حۋتور — رەد.) تۇرعىندارى ءبىر توپ بۇزاقىنىڭ قولىنان قازا تاپقان 16 جاستاعى ءجاسوسپىرىم شەرزات بولاتتىڭ ولىمىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ەڭ الدىمەن، اۋىل اقساقالدارى مارقۇمنىڭ وتباسىنا كوڭىل ايتىپ، الەۋمەتتىك جەلىدە جالعان اقپارات تاراپ جاتقانىن مالىمدەدى. سوزدەرىنشە، الىپ-قاشپا اڭگىمەلەرگە بايلانىستى اۋىلدىڭ اتىنا كۇيە جاعىلىپ جاتىر.
«ءبىزدىڭ اۋىلعا وتە قيىن ءتيىپ تۇر. قازا بولعان بالانىڭ اكەسىنە قايعىرىپ، كوڭىل ايتامىز. جاتقان جەرى جايلى بولسىن. «ءبىر قۇمالاق ءبىر قارىن مايدى شىرىتەدى»،– دەيدى. اۋىل بولعاننان كەيىن نەشە ءتۇرلى بولىپ جاتىر. ءبىزدىڭ اۋىل كىشكەنتاي بولعانىمەن، وتە ۇيىمشىل. سۋ تاسقىنى كەزىندە ءۇش كۇندە 2,5 ملن تەڭگە جيناپ بەردى. ءوز قولىممەن سول اقشانى مۇقتاجدارعا تابىستاعانمىن. حالىق بىلەدى. قاڭتار وقيعاسى كەزىندە دە بۇكىل تالعار ءۇنسىز جاتقان كەزدە وسى اۋىلدىڭ جىگىتتەرى بىرەۋ-مىرەۋ كىرىپ كەتپەسىن دەپ كەزەك-كەزەك كۇزەتتى. تاياقتىڭ دا ەكى ۇشى بولادى. سوڭىنا دەيىن شىداپ، جامان سوزدەر ايتپاسا ەكەن. ءارتۇرلى پىكىر ايتا بەرمەي، قۇقىق قورعاۋ ورگاندارىنا ارىزدارىن جازسىن، تەكسەرسىن»،—دەدى ولار.
تۇرعىنداردىڭ ايتۋلارىنشا، اتىشۋلى حاسان — كوپكە كومەگىن تيگىزىپ جۇرگەن ازامات.
«حاسان، كەرىسىنشە، وسى اۋىلدىڭ بىرلىگى مەن تىرلىگىنە شاپقىلاپ ءجۇر. مەكتەپكە دە، مەشىتكە دە اقشالاي كومەكتەسىپ كەلەدى. وسىنداي ازاماتتى قارالاپ، شەرزات مارقۇمنىڭ ءىسى ايدالادا قالدى. ودان ءوش الا الماي جۇرگەندەردىڭ ارەكەتىنە ۇقسايدى. ءيا، ونىڭ ءىنىسى تۇرمەدە وتىرعان شىعار. ال ونىڭ جەكە باسىنا ءتىل تيگىزۋگە بولمايدى. وعان دا اۋىر ءتيىپ جاتىر. دالەل بار ما، كەلىڭدەر، ۇستاپ بەرىڭدەر. ارى قاراي قۇقىق قورعاۋ ورگاندارى وزدەرى شەشەدى»،— دەپ تولىقتىردى اۋىل ازاماتتارى.
ايتا كەتەيىك، الەۋمەتتىك جەلىدە 16 جاستاعى ءجاسوسپىرىمدى ولتىرگەندەردىڭ «حۋتور» بانداسىنان شىققانى تۋرالى اقپارات تاراعان ەدى. ال ونىڭ باسشىسى رەتىندە حاسان ەسىمدى ازامات كورسەتىلگەن. جەلى قولدانۋشىلارىنىڭ مالىمەتىنشە، «حۋتورلار» بىرنەشە جىلدان بەرى بۇكىل قالانى ۇرەيدە ۇستاپ كەلگەن.
<
