Talǵar aýdany Rysqulov aýylynyń (burynǵy Hýtor — red.) turǵyndary bir top buzaqynyń qolynan qaza tapqan 16 jastaǵy jasóspirim Sherzat Bolattyń ólimine qatysty pikir bildirdi, dep habarlaıdy «Adyrna» tilshisi.
Eń aldymen, aýyl aqsaqaldary marqumnyń otbasyna kóńil aıtyp, áleýmettik jelide jalǵan aqparat tarap jatqanyn málimdedi. Sózderinshe, alyp-qashpa áńgimelerge baılanysty aýyldyń atyna kúıe jaǵylyp jatyr.
«Bizdiń aýylǵa óte qıyn tıip tur. Qaza bolǵan balanyń ákesine qaıǵyryp, kóńil aıtamyz. Jatqan jeri jaıly bolsyn. «Bir qumalaq bir qaryn maıdy shiritedi»,– deıdi. Aýyl bolǵannan keıin neshe túrli bolyp jatyr. Bizdiń aýyl kishkentaı bolǵanymen, óte uıymshyl. Sý tasqyny kezinde úsh kúnde 2,5 mln teńge jınap berdi. Óz qolymmen sol aqshany muqtajdarǵa tabystaǵanmyn. Halyq biledi. Qańtar oqıǵasy kezinde de búkil Talǵar únsiz jatqan kezde osy aýyldyń jigitteri bireý-mireý kirip ketpesin dep kezek-kezek kúzetti. Taıaqtyń da eki ushy bolady. Sońyna deıin shydap, jaman sózder aıtpasa eken. Ártúrli pikir aıta bermeı, quqyq qorǵaý organdaryna aryzdaryn jazsyn, teksersin»,—dedi olar.
Turǵyndardyń aıtýlarynsha, atyshýly Hasan — kópke kómegin tıgizip júrgen azamat.
«Hasan, kerisinshe, osy aýyldyń birligi men tirligine shapqylap júr. Mektepke de, meshitke de aqshalaı kómektesip keledi. Osyndaı azamatty qaralap, Sherzat marqumnyń isi aıdalada qaldy. Odan ósh ala almaı júrgenderdiń áreketine uqsaıdy. Iá, onyń inisi túrmede otyrǵan shyǵar. Al onyń jeke basyna til tıgizýge bolmaıdy. Oǵan da aýyr tıip jatyr. Dálel bar ma, kelińder, ustap berińder. Ary qaraı quqyq qorǵaý organdary ózderi sheshedi»,— dep tolyqtyrdy aýyl azamattary.
Aıta keteıik, áleýmettik jelide 16 jastaǵy jasóspirimdi óltirgenderdiń «Hýtor» bandasynan shyqqany týraly aqparat taraǵan edi. Al onyń basshysy retinde Hasan esimdi azamat kórsetilgen. Jeli qoldanýshylarynyń málimetinshe, «hýtorlar» birneshe jyldan beri búkil qalany úreıde ustap kelgen.
<
