باتىس قازاقستاندا ءتورت مىڭنان ءىرى قارا مال برۋتسەللەز اۋرۋىنا شالدىقتى، دەپ حابارلايدى «ادىرنا» ۇلتتىق پورتالى «موي گورود» پورتالىنا سىلتەمە جاساپ.
باتىس قازاقستان وبلىسىنىڭ ۆەتەريناريا باسقارماسى مالىمدەگەندەي، اۋىل شارۋاشىلىعى جانۋارلارى جىلىنا ەكى رەت برۋتسەللەزگە تەكسەرۋدەن وتەدى. جىل باسىنان بەرى 666,8 مىڭ ءىرى قارا مال تەكسەرىلىپ، 4 942-ءسى اۋرۋعا شالدىققانى انىقتالعان. سونداي-اق، 1,1 ميلليون ۇساق مالدىڭ 1 203-ءى وڭ ناتيجە كورسەتكەن.
«بۇگىنگى تاڭدا، 4 316 ءىرى قارا مال مەن 991 ۇساق مال سانيتارلىق سويۋعا جىبەرىلدى»، – دەپ حابارلادى باسقارما وكىلدەرى.
رەسمي دەرەكتەرگە سايكەس، سوڭعى 7 جىلدا مال اراسىندا برۋتسەللەز اۋرۋىنىڭ دەڭگەيى تومەندەگەنى بايقالادى. مىسالى، 2021 جىلى 6 490 باس ءىرى قارا مال اۋرۋعا شالدىقسا، 2022 جىلى – 5 045, ال 2023 جىلى بۇل كورسەتكىش 4 141 باسقا دەيىن ازايعان. اۋرۋ مالدار وبلىستاعى التى مامانداندىرىلعان ۇيىمعا جىبەرىلەدى. ۆەدومستۆونىڭ مالىمەتىنشە، برۋتسەللەزگە شالدىققان 329 باس ۇساق مالدىڭ ەتى ءۇشىن 5,4 ميلليون تەڭگە وتەماقى تولەنگەن.
