مەملەكەت باسشىسىنىڭ ۇلتتىق قۇرىلتايدىڭ العاشقى وتىرىسىنداعى تاپسىرماسىنا سايكەس، ۇلىتاۋ اۋدانىنداعى اۋليەتاۋدىڭ ەتەگىندە اشىلعان الاڭنىڭ جالپى اۋماعى ءۇش گەكتاردى قۇرايدى. قر كونستيتۋتسياسى كۇنىنىڭ قارساڭىندا ەل يگىلىگىنە بەرىلگەن نىساندا بيىكتىگى 22 مەتر بولاتىن مەملەكەتتىك تۋ، تۇعىرتاستا ەلتاڭبا، ءانۇران بەينەلەنسە، «تاۋەلسىز قازاقستان»، «قازاق حاندىعى»، «تۇرىك قاعاناتى»، «التىن وردا» بارەلەفتى قابىرعالارى، 99 رۋدىڭ بەلگىسى قاشالعان «تاڭبالى تاس» ورناتىلعان.
اشىلۋ سالتاناتىنا قاتىسقان ۇلىتاۋ وبلىسىنىڭ اكىمى بەرىك ابدىعاليۇلى الاڭنىڭ ۇلت دەڭگەيىندەگى ماڭىزىنا توقتالدى.
«وزدەرىڭىز بىلەتىندەي، 2022 جىلى ۇلتتىق قۇرىلتايدىڭ العاشقى وتىرىسى ءبىزدىڭ وبلىستا ءوتتى، القالى جيىندا ەل پرەزيدەنتى قاسيەتتى وڭىردەگى ارنايى ورىندا كوك بايراعىمىزدىڭ جەلبىرەپ تۇرۋىن تاپسىرعان بولاتىن. ماڭىزدى جوبانىڭ قۇرىلىسى بىلتىر كۇزدە باستالىپ، ۇدايى قاداعالاۋدا بولدى. بۇگىن مىنە، مەرەكە قارساڭىندا اشىلىپ وتىر. رامىزدەر الاڭى ۇرپاق قاستەر تۇتاتىن ورىنعا اينالسىن»-دەدى ءوڭىر باسشىسى ءوز سوزىندە.
ايتا كەتەيىك، رامىزدەر الاڭىنىڭ سكۋلپتورى - ەلىمىزگە بەلگىلى سۋرەتشى-مونۋمەنتشى عازيز ەشكەنوۆ. جوبا اۆتورىنىڭ ايتۋىنشا، بۇل - «تاڭبالى تاس» ورناتىلعان ەلىمىزدەگى تۇڭعىش الاڭ.
