قازاقستاننىڭ سىرتقى قارىزى 2024 جىلدىڭ ءبىرىنشى جارتىجىلدىعىندا 166,7 ملرد دوللارعا دەيىن ءوستى. بۇل تۋرالى ۇلتتىق بانك مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، قازاقستاننىڭ سىرتقى قارىزى 1 شىلدەدەگى جاعداي بويىنشا 2024 جىلدىڭ باسىمەن سالىستىرعاندا 3 ميلليارد دوللارعا ءوسىپ، 166,7 ميلليارد دوللاردى قۇرادى.
«قازاقستاننىڭ سىرتقى قارىزىنىڭ 87,5%-ى – ۇزاق مەرزىمدى سىرتقى قارىزعا تيەسىلى. بۇل ءبىر جاعىنان وتىمدىلىك قاۋپىن ازايتسا، ەكىنشى جاعىنان قارىزدى وتەۋ مەن قىزمەت كورسەتۋگە نارىقتىق جاعدايلاردىڭ وزگەرۋىنىڭ ىقپالىن كۇشەيتەدى. قارىزدىڭ قارجىلىق قۇرالدار تۇرلەرى بويىنشا قۇرىلىمىندا رەزيدەنت ەمەستەردەن الىنعان نەسيەلەر مەن قارىزدار باسىمدىققا يە (73,9%), ال رەزيدەنت ەمەستەر قولىنداعى بورىشتىق باعالى قاعازدار 8,0%-دى قامتيدى»، – دەلىنگەن ۇلتتىق بانك حابارلاماسىندا.
ەسكە سالايىق، قازاقستاننىڭ سىرتقى قارىزى 2023 جىلدىڭ ءۇشىنشى توقسانىنىڭ قورىتىندىسى بويىنشا 161,9 ملرد دوللاردى قۇراعان.
