Qazaqstannyń syrtqy qaryzy 2024 jyldyń birinshi jartyjyldyǵynda 166,7 mlrd dollarǵa deıin ósti. Bul týraly Ulttyq bank málimdedi, dep habarlaıdy “Adyrna” ulttyq portaly.
Málimet boıynsha, Qazaqstannyń syrtqy qaryzy 1 shildedegi jaǵdaı boıynsha 2024 jyldyń basymen salystyrǵanda 3 mıllıard dollarǵa ósip, 166,7 mıllıard dollardy qurady.
«Qazaqstannyń syrtqy qaryzynyń 87,5%-y – uzaq merzimdi syrtqy qaryzǵa tıesili. Bul bir jaǵynan ótimdilik qaýpin azaıtsa, ekinshi jaǵynan qaryzdy óteý men qyzmet kórsetýge naryqtyq jaǵdaılardyń ózgerýiniń yqpalyn kúsheıtedi. Qaryzdyń qarjylyq quraldar túrleri boıynsha qurylymynda rezıdent emesterden alynǵan nesıeler men qaryzdar basymdyqqa ıe (73,9%), al rezıdent emester qolyndaǵy boryshtyq baǵaly qaǵazdar 8,0%-dy qamtıdy», – delingen Ulttyq bank habarlamasynda.
Eske salaıyq, Qazaqstannyń syrtqy qaryzy 2023 jyldyń úshinshi toqsanynyń qorytyndysy boıynsha 161,9 mlrd dollardy quraǵan.
