بۇگىن پرەزيدەنت توقاەۆ رەسمي ساپارمەن تۇركىمەنستانعا باردى، دەپ حابارلايدى "ادىرنا" ۇلتتىق پورتالى.
اقوردانىڭ حابارلاۋىنشا، اشحاباد اۋەجايىندا قاسىم-جومارت توقاەۆتى حالك ماسلاحاتىنىڭ توراعاسى گۋربانگۋلى بەردىمۇحامەدوۆ قارسى الدى. قۇرمەت قاراۋىلىنىڭ باستىعى راپورت بەرگەننەن كەيىن ەكى ەلدىڭ ءانۇراندارى ورىندالدى.
ساپار اياسىندا قاسىم-جومارت توقاەۆ پەن سەردار بەردىمۇحامەدوۆ كەلىسسوز جۇرگىزەدى. سونداي-اق پرەزيدەنت اشحابادتاعى اباي قۇنانبايۇلىنىڭ ەسكەرتكىشىن اشىپ، «داۋىرلەر مەن وركەنيەتتەر بايلانىسى – بەيبىتشىلىك پەن دامۋدىڭ نەگىزى» اتتى حالىقارالىق فورۋمعا قاتىسادى.
پرەزيدەنت قاسىم-جومارت توقاەۆتىڭ تۇرىكمەنستانعا رەسمي ساپارى تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆپەن كەزدەسۋدەن باستالدى.
مەملەكەت باسشىسى قوناقجايلىق تانىتقانى ءۇشىن حالك ماسلاحاتىنىڭ توراعاسىنا ريزاشىلىق ءبىلدىردى. سونداي-اق گۋربانگۋلى بەردىمۇحامەدوۆتىڭ قازاقستان مەن تۇرىكمەنستان اراسىنداعى قارىم-قاتىناستى نىعايتۋعا زور ۇلەس قوسقانىن اتاپ ءوتتى.
پرەزيدەنت قازاق-تۇرىكمەن ىنتىماقتاستىعى دوستىق، تاتۋ كورشىلىك جانە ءوزارا قولداۋ رۋحىندا قارقىندى دامىپ كەلە جاتقانىنا ەرەكشە نازار اۋدارىپ، تۇرىكمەنستانعا رەسمي ساپارىنىڭ ماقساتى ەكى ەلدىڭ ستراتەگيالىق سەرىكتەستىگىن جاڭا دەڭگەيگە شىعارۋ ەكەنىن ايتتى.
ء"سىزدىڭ ەلىڭىزبەن ىنتىماقتاستىقتى دامىتۋ ماسەلەسىنە زور جاۋاپكەرشىلىكپەن قارايمىز. ءبىز – ستراتەگيالىق سەرىكتەس ەلدەرمىز. جاڭا بىرلەسكەن ۇكىمەتارالىق كوميسسيانىڭ جۇمىسى تۋرالى ايتىپ ءوتتىڭىز. مەن دە ونىڭ قىزمەتىن باقىلاپ، ۇكىمەتكە باعىت-باعدار بەرىپ، قانداي شەشىم قابىلداۋ كەرەك ەكەنىن نۇسقاپ وتىرامىن. ويتكەنى ءبىز ءۇشىن تۇرىكمەنستانمەن دوستىق بايلانىس باستى باسىمدىقتاردىڭ ءبىرى سانالادى", – دەدى قاسىم-جومارت توقاەۆ.
ايتا كەتەيىك، كەشە قازاقستان باسشىسى تاۋەلسىز مەملەكەتتەر دوستاستىعى ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىسىپ، باسقالاردى باتۋاعا شاقىرعانىن جازعان ەدىك.
