تۇركىمەن حالقىنىڭ ۇلتتىق كوشباسشىسى، ارقاداع گۋربانگۋلى بەردىمۇحامەدوۆ ەل پرەزيدەنتى، ءارى ۇلى سەردار بەردىمۇحامەدوۆكە قاسيەتتى ورازا بايرامىنا وراي قۇتتىقتاۋ جولدادى، دەپ حابارلايدى “ادىرنا”.
قۇتتىقتاۋدا ورازا ايى – رۋحاني كەمەلدىك پەن ادامگەرشىلىك تازالىقتىڭ كەزەڭى رەتىندە سيپاتتالىپ، بۇل ۋاقىت حالىقتىڭ ىزگىلىككە، قايىرىمدىلىققا جانە ءدىني قۇندىلىقتارعا بەت بۇرۋىنا ىقپال ەتەتىنى ايتىلدى. سونداي-اق، بۇل كەزەڭدە ادامداردىڭ نيەتتەرى تازاراتىنى، ال قوعامدا ءوزارا تۇسىنىستىك پەن كەلىسىمنىڭ كۇشەيەتىنى ەرەكشە اتاپ ءوتىلدى.
ۇزاق-سونار ماتىندە قازىرگى تۇركىمەنستاننىڭ دامۋ باعىتىنا دا باعا بەرىلگەن. بەردىمۇحامەدوۆتىڭ باسشىلىعىمەن ەلدىڭ الەۋمەتتىك-ەكونوميكالىق جاعدايى جاقسارىپ كەلە جاتقانى ايتىلدى.
«ەلىمىز قارقىندى دامىپ، جاڭا بيىكتەرگە نىق قاداممەن ىلگەرىلەۋدە. ءسىزدىڭ باسشىلىعىڭىزبەن حالىقتىڭ ءومىر ءسۇرۋ دەڭگەيى ۇزدىكسىز ارتىپ كەلەدى. ەلىمىز العا قاراي نىق قاداممەن دامۋدىڭ جاڭا بيىكتەرىنە بەت الۋدا»، – دەپ كورسەتىلدى.
قورىتىندىلاي كەلە، قۇتتىقتاۋدا بەردىمۇحامەدوۆ ۇلىنا مىقتى دەنساۋلىق، ۇزاق عۇمىر جانە تابىس تىلەدى.
