قۇرمەتى وقىرمان قاۋىم، ءيىسى قازاق قاراشا!
كوڭىل ءبولىپ سوڭىنا دەيىن قاراپ شىعۋلارىڭىزدى وتىنەمىن.
ەستەرىڭىزدى بولسا وسىدان ءتورت جىل بۇرىن جەرلەسىمىز قازمقپۋ-ڭ ستۋدەنتى اقجارقىن تۇرلىباي نيگەريالىق ازاماتتاردىڭ الداۋىنا ءتۇسىپ، "اناشا تاسىمالدادى"-دەگەن
جالامەن قىتايدان مالايزياعا ۇشىپ بارا جاتقان جەرىنەن ۇستالىپ، قاتال ۇكىممەن قىتاي تۇرمەسىندە ءومىر بويى باس بوستاندىعىنان ايىرىلۋ جازاسىنا كەسىلىپ جاتقانىنا مىنە، بيىل ءتورت جىلدىڭ ءجۇزى بولدى...
بۇل قىزىمىزدىڭ اتا-اناسىنىڭ الەۋمەتتىك جاعدايىن ەسكەرىپ، بىلىكتى زاڭگەر، ءتورت ءتىلدى ەركىن مەڭگەرگەن اپتال ازامات سۇڭقار نۇرماعانبەتوۆ جاناشىرلىقپەن ازاماتتىق تانىتىپ، تەگىن ادۆوكاتتىق قىزمەت جاساپ كەلەدى. (ونىڭ اسپان استى ەلىنە ءتورت جىل ىشىندە بىرنەشە رەت ۇشىپ بارىپ كەلۋى، جاتىن ورنى ت.ب. ءوز الدىنا بولەك اڭگىمە...)
ايتپاعىم - الداعى 3-قىركۇيەك كۇنى قىتاي مەملەكەتىندە اقجارقىن تۇرلىبايدىڭ شەشۋشى سوتى بولماق...
بۇعان دەيىنگى سوتىنىڭ بىرىنە ارەڭ قاتىسقان اناسى قىزىنىڭ سوڭعى ۇكىمىن ءوز قۇلاعىمەن تىڭداپ، بالاسىن باۋىرىنا ءبىر باسىپ، ماڭدايىنان يىسكەپ قايتۋعا قول قىسقالىعىنان ەش مۇمكىندىگى بولماي تۇر...
جۇرەگى قانعا، كوزى جاسقا تولعان انا بەيباقتىڭ ءتىلى دە، قولى دا قىسقا بوپ تۇرعانى مەنىڭ ازاماتتىق ارىمدى تىنىش جاتقىزا المادى...
قۇرمەتتى قانداستار، كوزى اشىق،كوكىرەگى وياۋ ازاماتتار، كوزى قاراقتى وقىرمان، ءيىسى قازاق!
ەل باسىنا كۇن تۋعاندا جۇدىرىقتاي جۇمىلىپ، ءبىر جاعادان باس، ءبىر جەڭنەن قول شىعارار بىرلىگىمىزدى تانىتايىق. بارامىزدە ەت پەن سۇيەكتەن جارالعان پەندەمىز. وتكەنىمىز وزىمىزگە بەلگىلى بولعانىمەن، الداعى ءومىرىمىز تەك ءبىر اللاعا ايان. كىمنىڭ الدىنان كىم شىعىپ كورىپتى...
كۇيىكتىڭ قارا شايىن سوراپتاعان ءبىر قازاق شاڭىراعىن تابالاماي، اداسا باسقان قازاق قىزىن ورىنسىز كىنالاماي، ازاماتتىق قولعابىسىمىزدى كورسەتىپ، جاناشىرلىق تانىتىپ، مۇمكىندىگىنشە قول سوزايىق.
بۇل - ءاربىرىمىزدىڭ يمان جولىنداعى ادامي بورىشىمىز، ازاماتتىق پارىزىمىز سانالماق. اللا جولىنا قايىرىمدىلىق جاساساق، ءتاڭىر يەم قايتىمىن ەسەلەپ بەرەرى ءسوزسسىز. پەيىلى مەن مەيىرىمى شەكسىز، قوناعىنا استىنداعى جالعىز اتىن سويىپ بەرەر قازاق دەگەن جومارت ەلدىڭ، زايىرلى ەلدىڭ ۇرپاعىمىز عوي. ازاماتتىعىمىزدى، وزگە ەلدىڭ الدىنداعى ەلدىگىمىز بەن ەرلىگىمىزدى، بىرلىگىمىزدى كورسەتەيىك، اعايىن. قاۋمالاعان 18 ملن حالىق بولا تۇرا باسىنا كۇن تۋعان بەيباق انانىڭ جولىنا تيىن-تەبەن ۇستاتا الماساق، سۇرىنگەنگە سۇيەۋ بولا الماساق، وندا نەسىنە "ەگەمەن ەلمىز، دەموكراتيالى مەملەكەتپىز، اتاعىمىز بەن ابىرويىمىز اسپانداپ، التى قۇرلىقتى باعىندىردىق" دەپ كوكىرەك كەرىپ، اتوي سالىپ ايعايلايمىز؟!
ىشتەي مۇجىلگەن قازاق اناسىنىڭ قولتىعان دەمەپ، سۋ بۇركەي الماساق ءبىزدىڭ مۇسىلماندىعىمىز قايسى؟ ونسىز دا قاپتاعان قىتاي ەلىندە قانشاما مىڭداعان قانداستارىمىز تاعدىردىڭ تاۋقىمەتىن تارتىپ جاتقانى بەلگىلى عوي...
ا. تۇرلىبايدىڭ شەشۋشى سوتى بۇل. جازا باسقان قاراكوز قازاق قىزىنا شىعارىلعان ۇكىم كۇشىن جويماسا، ءبىر قازاقتىڭ قىزعالداعى قاپتاعان قىتايدىڭ تەمىر تورىندا ءشىريدى دەگەن ءسوز. ءبىر قىزعالداق ەلىنىڭ ساف اۋاسىن جۇتۋعا، اۋىلىنىڭ قاسقا ءيتىن كورۋگە زار بولىپ، مەزگىلسىز سوليدى دەگەن ءسوز. ودان تارايتىن قازاق ۇرپاعىنىڭ ءوزى ءبىر توبە ماسەلە...
ونسىز دا ءتورت جىلدان بەرى ولمەستىڭ كۇيىن كەشىپ، تەمىر توردا توعىتىلىپ، ازاپتى كۇندەردى باسىنان وتكەرىپ جۇرگەن قارلىعاشىمىزدىڭ جاستىعىنىڭ قۇرعاق بولعان كۇنىنە كىم كەپىلدىك بەرە الادى...
اقجارقىننىڭ تۇرمەدەگى ءتارتىبىنىڭ جاقسى بولۋىنىڭ ناتيجەسىندە سول ەلدەگى ەلشىلىك پەن ءبىزدىڭ ەلدىڭ سىرتقى ىستەر مينيسترلىگى، ادۆوكات
س. نۇرماعانبەتوۆتىڭ ونىمەن جۇزدەسىپ، سوت ءىسىنىڭ ىلگەرىلەنۋىنە مۇمكىندىك تۋىپ تۇر.
رەسمي دەرەكتەرگە سۇيەنسەك، اقجارقىننىڭ قىزدار مەملەكەتتىك پەداگوگيكالىق ۋنيۆەرسيتەتىندەگى مىنەز-قۇلىق، ساباق ۇلگەرىمى، ءتارتىبى وتە جاقسى بولعان، ءارى بەس ۋاقىت ناماز وقيتىن ۇزدىك ستۋدەنت ەكەن...
تەمىر توردىڭ ار جاعىندا قاراپ جاتپاي، جۇكتەلگەن ەڭبەككە ارالاسىپ، ءوز بەتىنشە ىزدەنىپ، قىتاي ءتىلىن ەركىن مەڭگەرىپ العانى سونشالىقتى، كەزەكتى سوت وتىرىسىندا سوت ءىسىن جۇرگىزۋدە اۋدارماشى قىزمەتىنەن تۇبەگەيلى باس تارتىپتى...
مەن مۇنىمەن اقجارقىندى ءجۇز پايىز اقتاپ، قۋ قىتايدى داتتاعالى وتىرعانىم جوق.
قىتاي زاڭى تىم قاتال ەكەنى ايتپاسا دا بەلگىلى. جەرلەسىمىزگە الدەقانداي زاڭ ۇكىمى شىعاراتىنى ءبىر اللاعا ايان. قۇدايى جوق قىتاي مەملەكەتى ەگەر سوت ۇكىمىن ءوز كۇشىندە قالدىرىپ، اقجارقىندى ءومىر بويى باس بوستاندىعىنان ايىرۋ جانە ونى قىتاي ەلىندە وتەۋىن ءلازىم دەپ تاپسا، ءسىز بەنەن ءبىزدىڭ دەمەۋىمىزبەن سوت پروتسەسسىنە اناسى قاتىسسا، زار يلەگەن انانىڭ بوزتورعايداي بالاپانىنىن سوڭعى رەت قۇشۋى، سوڭعى رەت ماڭدايىنان يىسكەۋى بولار بالكىم...
جاراتقان يەم شاپاعاتىن توگىپ، قىتاي سوتى مەيىرىمدىلىك تانىتىپ، قىزىمىزدى تىم قۇرىعاندا ەلگە ەكستراديتسيالاۋ ماسەلەسىنە ۇكىم شىعارسا - وندا ءبىزدىڭ، قازاقتىڭ ولجاسى، قازاقتىڭ ۇتقانى، ءبىر قازاق شاڭىراعىنىڭ تاڭىنىڭ كۇلىپ، ارايلانىپ اتقانى-ءدۇر...
سول اق تاڭنىڭ تۋىنا ءسىز بولىپ، ءبىز بولىپ مۇرىندىق بولايىق، اعايىن! قازاقتا اتىمتاي جومارت ازاماتتار كوپ-اق. سول جومارتتىعىمىزدى دالەلدەيىك. ازاماتتىق تانىتايىق!
اللا جولىنا دەپ بەرگەن قايىرىمدىلىعىڭىز اللادان ەسەلەنىپ قايتسىن، قۇرمەتتى ءيىسى قازاق.
كەڭ بايتاق دالانى مەكەن ەتكەن 18 ملن حالىق اقجارقىننىڭ اناسىنىڭ ەسەپ شوتىنا مۇمكىندىگىمىزشە، تىم قۇرىعاندا مىڭ تەڭگەدەن سالساق، اقجارقىن تۇرلىبايدىڭ اناسى زۋحرا سەيتىموۆاعا ۇلكەن كومەك، دەمەۋ بولارى انىق...
ەندەشە، جۇرت بولىپ جۇمىلىپ، ۇلت بولىپ ۇيىسايىق، قادىرلى قازاق ەلى! ۋاقىت وتە از قالدى...
بۇل وتباسىنا ەش تۋىستىق، تانىستىق قاتىسىم جوق، بىراق قازاقتىڭ ءبىر قارا قىزى ءۇشىن، بەيباق انا ءۇشىن بوزتورعايداي شىرىلداپ، سىزدەرگە ءۇن قاتتىم. يماندى، مەيىرىمدى جاندار قاراپ قالماس دەگەن ۇمىتتەمىن. تۇسىنىستىك تانىتارسىزدار دەگەن ويدامىن. بارشاڭىزعا الدىن-الا مىڭ العىس. اللانىڭ نۇرى جاۋسىن!
ايگۇل تورەبەكوۆا
"ادىرنا" ۇلتتىق پورتالى
