3-qyrkúıekte Aqjarqyn Turlybaıdyń sheshýshi soty bolmaq

10419

Qurmeti oqyrman qaýym, ıisi qazaq qarasha!
Kóńil bólip sońyna deıin qarap shyǵýlaryńyzdy ótinemin.
Esterińizdi bolsa osydan tórt jyl buryn jerlesimiz QazMQPÝ-ń stýdenti Aqjarqyn Turlybaı nıgerııalyq azamattardyń aldaýyna túsip, "Anasha tasymaldady"-degen
jalamen qytaıdan Malaızııaǵa ushyp bara jatqan jerinen ustalyp, qatal úkimmen qytaı túrmesinde ómir boıy bas bostandyǵynan aıyrylý jazasyna kesilip jatqanyna mine, bıyl tórt jyldyń júzi boldy...
Bul qyzymyzdyń ata-anasynyń áleýmettik jaǵdaıyn eskerip, bilikti zańger, tórt tildi erkin meńgergen aptal azamat Suńqar Nurmaǵanbetov janashyrlyqpen azamattyq tanytyp, tegin advokattyq qyzmet jasap keledi. (Onyń aspan asty eline tórt jyl ishinde birneshe ret ushyp baryp kelýi, jatyn orny t.b. óz aldyna bólek áńgime...)
Aıtpaǵym - aldaǵy 3-qyrkúıek kúni qytaı memleketinde Aqjarqyn Turlybaıdyń sheshýshi soty bolmaq...
Buǵan deıingi sotynyń birine áreń qatysqan anasy qyzynyń sońǵy úkimin óz qulaǵymen tyńdap, balasyn baýyryna bir basyp, mańdaıynan ıiskep qaıtýǵa qol qysqalyǵynan esh múmkindigi bolmaı tur...
Júregi qanǵa, kózi jasqa tolǵan ana beıbaqtyń tili de, qoly da qysqa bop turǵany meniń azamattyq arymdy tynysh jatqyza almady...
Qurmetti qandastar, kózi ashyq,kókiregi oıaý azamattar, kózi qaraqty oqyrman, ıisi qazaq!
El basyna kún týǵanda judyryqtaı jumylyp, bir jaǵadan bas, bir jeńnen qol shyǵarar birligimizdi tanytaıyq. Bárámizde et pen súıekten jaralǵan pendemiz. Ótkenimiz ózimizge belgili bolǵanymen, aldaǵy ómirimiz tek bir Allaǵa aıan. Kimniń aldynan kim shyǵyp kóripti...
Kúıiktiń qara shaıyn soraptaǵan bir qazaq shańyraǵyn tabalamaı, adasa basqan qazaq qyzyn orynsyz kinálamaı, azamattyq qolǵabysymyzdy kórsetip, janashyrlyq tanytyp, múmkindiginshe qol sozaıyq.
Bul - árbirimizdiń ıman jolyndaǵy adamı boryshymyz, azamattyq paryzymyz sanalmaq. Alla jolyna qaıyrymdylyq jasasaq, Táńir ıem qaıtymyn eselep bereri sózssiz. Peıili men meıirimi sheksiz, qonaǵyna astyndaǵy jalǵyz atyn soıyp berer qazaq degen jomart eldiń, zaıyrly eldiń urpaǵymyz ǵoı. Azamattyǵymyzdy, ózge eldiń aldyndaǵy eldigimiz ben erligimizdi, birligimizdi kórseteıik, aǵaıyn. Qaýmalaǵan 18 mln halyq bola tura basyna kún týǵan beıbaq ananyń jolyna tıyn-teben ustata almasaq, súringenge súıeý bola almasaq, onda nesine "Egemen elmiz, demokratııaly memleketpiz, ataǵymyz ben abyroıymyz aspandap, alty qurlyqty baǵyndyrdyq" dep kókirek kerip, atoı salyp aıǵaılaımyz?!
Ishteı mújilgen qazaq anasynyń qoltyǵan demep, sý búrkeı almasaq bizdiń musylmandyǵymyz qaısy? Onsyz da qaptaǵan qytaı elinde qanshama myńdaǵan qandastarymyz taǵdyrdyń taýqymetin tartyp jatqany belgili ǵoı...
A. Turlybaıdyń sheshýshi soty bul. Jaza basqan qarakóz qazaq qyzyna shyǵarylǵan úkim kúshin joımasa, bir qazaqtyń qyzǵaldaǵy qaptaǵan qytaıdyń temir torynda shirıdi degen sóz. Bir qyzǵaldaq eliniń saf aýasyn jutýǵa, aýylynyń qasqa ıtin kórýge zar bolyp, mezgilsiz solıdy degen sóz. Odan taraıtyn qazaq urpaǵynyń ózi bir tóbe másele...
Onsyz da tórt jyldan beri ólmestiń kúıin keship, temir torda toǵytylyp, azapty kúnderdi basynan ótkerip júrgen qarlyǵashymyzdyń jastyǵynyń qurǵaq bolǵan kúnine kim kepildik bere alady...
Aqjarqynnyń túrmedegi tártibiniń jaqsy bolýynyń nátıjesinde sol eldegi elshilik pen bizdiń eldiń Syrtqy ister mınıstrligi, advokat
S. Nurmaǵanbetovtyń onymen júzdesip, sot isiniń ilgerilenýine múmkindik týyp tur.
Resmı derekterge súıensek, Aqjarqynnyń Qyzdar Memlekettik Pedagogıkalyq Ýnıversıtetindegi minez-qulyq, sabaq úlgerimi, tártibi óte jaqsy bolǵan, ári bes ýaqyt namaz oqıtyn úzdik stýdent eken...
Temir tordyń ar jaǵynda qarap jatpaı, júktelgen eńbekke aralasyp, óz betinshe izdenip, qytaı tilin erkin meńgerip alǵany sonshalyqty, kezekti sot otyrysynda sot isin júrgizýde aýdarmashy qyzmetinen túbegeıli bas tartypty...
Men munymen Aqjarqyndy júz paıyz aqtap, qý qytaıdy dattaǵaly otyrǵanym joq.
Qytaı zańy tym qatal ekeni aıtpasa da belgili. Jerlesimizge áldeqandaı zań úkimi shyǵaratyny bir Allaǵa aıan. Qudaıy joq qytaı memleketi eger sot úkimin óz kúshinde qaldyryp, Aqjarqyndy ómir boıy bas bostandyǵynan aıyrý jáne ony qytaı elinde óteýin lázim dep tapsa, siz benen bizdiń demeýimizben sot proessine anasy qatyssa, zar ılegen ananyń boztorǵaıdaı balapanynyn sońǵy ret qushýy, sońǵy ret mańdaıynan ıiskeýi bolar bálkim...
Jaratqan ıem shapaǵatyn tógip, qytaı soty meıirimdilik tanytyp, qyzymyzdy tym quryǵanda elge ekstradıııalaý máselesine úkim shyǵarsa - onda bizdiń, qazaqtyń oljasy, qazaqtyń utqany, bir qazaq shańyraǵynyń tańynyń kúlip, araılanyp atqany-dúr...
Sol aq tańnyń týýyna siz bolyp, biz bolyp muryndyq bolaıyq, aǵaıyn! Qazaqta Atymtaı jomart azamattar kóp-aq. Sol jomarttyǵymyzdy dáleldeıik. Azamattyq tanytaıyq!
Alla jolyna dep bergen qaıyrymdylyǵyńyz Alladan eselenip qaıtsyn, qurmetti ıisi qazaq.
Keń baıtaq dalany meken etken 18 mln halyq Aqjarqynnyń anasynyń esep shotyna múmkindigimizshe, tym quryǵanda myń teńgeden salsaq, Aqjarqyn Turlybaıdyń anasy Zýhra Seıtimovaǵa úlken kómek, demeý bolary anyq...
Endeshe, jurt bolyp jumylyp, ult bolyp uıysaıyq, qadirli qazaq eli! Ýaqyt óte az qaldy...
Bul otbasyna esh týystyq, tanystyq qatysym joq, biraq qazaqtyń bir qara qyzy úshin, beıbaq Ana úshin boztorǵaıdaı shyryldap, sizderge ún qattym. Imandy, meıirimdi jandar qarap qalmas degen úmittemin. Túsinistik tanytarsyzdar degen oıdamyn. Barshańyzǵa aldyn-ala myń alǵys. Allanyń nury jaýsyn!

 

Aıgúl TÓREBEKOVA

"Adyrna" ulttyq portaly

Pikirler