«قازاقمىس» كومپانياسىنىڭ بالقاش قالاسى ماڭىنداعى «ساياق-3» شاحتاسىندا قايعىلى وقيعا بولىپ، ەكى جۇمىسشى قازا تاپتى، دەپ حابارلايدى «ادىرنا» ءتىلشىسى.
كومپانيانىڭ مالىمەتىنشە، 6 قازان كۇنى شاحتادا كومىرتەگى گازى بولىنگەن.
«بارلىق جۇمىسشى جەدەل تۇردە ەۆاكۋاتسيالاندى. زارداپ شەككەندەر جاقىن جەردەگى مەديتسينالىق مەكەمەلەرگە جەتكىزىلدى. وكىنىشكە قاراي، ەكى جۇمىسشى قازا بولدى»،—دەلىنگەن حابارلامادا.
قازىرگى تاڭدا وقيعانىڭ ءمان-جايى مەن سەبەپتەرى انىقتالىپ جاتىر. قايعىلى جاعدايدى تەكسەرۋ ءۇشىن ارنايى كوميسسيا قۇرىلدى.
«قازاقمىس» باسشىلىعى قازا تاپقانداردىڭ وتباسىلارى مەن جاقىندارىنا كوڭىل ايتىپ، مارقۇمداردىڭ وتباسىلارىنا قاجەت بارلىق كومەك كورسەتىلەتىنىن مالىمدەدى.
ەسكە سالايىق، 2023 جىلدىڭ 27 قاراشاسىندا جامبىل وبلىسىنداعى «جايسان» كەنىشىندە جازاتايىم وقيعا بولىپ، سالدارىنان ەكى ادام قازا تاپقان ەدى.
