شاحتاداعى اپاتتان قازا تاپقانداردىڭ وتباسىنا قانشا قاراجات بەرىلەتىنى بەلگىلى بولدى، دەپ حابارلايدى “ادىرنا” ءتىلشىسى.
قايتىس بولعانداردىڭ وتباسىنا بەرىلەتىن قارجى تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتىپ بەردى.
ءمينيستردىڭ ايتۋىنشا، قازا تاپقان ازاماتتاردىڭ وتباسىلارىنا اسىراۋشىسىنان ايرىلۋىنا بايلانىستى جاردەماقى تاعايىندالاتىن بولادى.
جاردەماقى رەسپۋبليكالىق بيۋدجەتتەن، الەۋمەتتىك ساقتاندىرۋ قورىنان، ءومىردى ساقتاندىرۋ كومپانياسىنان تولەنبەك.
اسىراۋشىسىنان ايىرىلعان وتباسىنداعى بالالارعا 18 جاسقا دەيىن اي سايىن 400-500 مىڭ تەڭگەدەن باستاپ بەرىلىپ وتىراتىنىن ايتتى سۆەتلانا جاقىپوۆا.
ال بالالار جوعارى وقۋ ورىندارىندا ءبىلىم الىپ جاتقان بولسا، وندا 23 جاسقا دەيىن تولەنەدى.
“ازىرشە بارلىق تولەمدى وتەۋ «ارسەلورميتتال تەمىرتاۋ» كومپانياسىنا جۇكتەلەدى. كاسىپورىن ۇجىمدىق شارتقا سايكەس جىلدىق تولەم تاۋەكەلدەرىن تولەۋگە مىندەتتەلىپ وتىر. «ارسەلورميتتال تەمىرتاۋ» كومپانياسى جەرلەۋ راسىمدەرىنە بايلانىستى بارلىق شىعىندى، سونداي-اق بالالاردى جوعارى وقۋ ورىندارىندا وقىتۋدى ءوز موينىنا الۋعا ءتيىس", – دەدى مينيستر.
اپاتتان قايتىس بولعانداردىڭ سانى 43-كە جەتتى. تاعى 3 كەنشىنى ىزدەۋ جۇمىستارى جۇرۋدە.
