رەسەي پرەزيدەنتى ۆلاديمير پۋتين سارسەنبى كۇنى سوتتالعاندارمەن اسكەري كەلىسىمشارت جاساۋعا مۇمكىندىك بەرەتىن ەكى زاڭعا قول قويدى، دەپ حابارلايدى "ادىرنا" ۇلتتىق پورتالى.
رەسەي پرەزيدەنتى موبيليزاتسيا كەزىندە نەمەسە سوعىس ۋاقىتىندا ىستەرى ءبىرىنشى ساتىدا نەمەسە اپەللياتسيالىق سوتتا قارالىپ جاتقان ايىپتالۋشىلارمەن شارت جاساسۋعا مۇمكىندىك بەرەتىن ەكى زاڭعا قول قويدى. ەكى زاڭ دا قۇقىقتىق اقپاراتتىڭ رەسمي ينتەرنەت-پورتالىندا جاريالانعان.
ەكىنشى زاڭ جۇمىلدىرۋ بويىنشا اسكەري قىزمەتكە شاقىرىلعان نەمەسە قورعانىس مينيسترلىگىمەن كەلىسىم-شارت جاساسقان سوتتالۋشىلاردى قىلمىستىق جاۋاپكەرشىلىكتەن بوساتۋعا مۇمكىندىك بەرەدى.
سوتتالۋشىلار مەملەكەتتىك ناگرادا العان نەمەسە جاسىنا، دەنساۋلىعىنا بايلانىستى، جۇمىلدىرۋ مەرزىمىنىڭ اياقتالۋىنا بايلانىستى اسكەري قىزمەتتەن بوساتىلعاننان كەيىن نەمەسە سوعىس جاعدايى جويىلعاننان كەيىن قىلمىستىق جاۋاپكەرشىلىكتەن تولىق بوساتىلۋ مۇمكىندىگى دە قارالعان.
ءبىرىنشى زاڭ جوباسىنا تۇزەتۋلەر رەسەي فەدەراتسياسىنىڭ قىلمىستىق ءىس جۇرگىزۋ كودەكسىنە، ال ەكىنشى زاڭ جوباسىنا «اسكەري مىندەت جانە اسكەري قىزمەت تۋرالى» زاڭعا ەنگىزىلەدى.
مەملەكەتتىك دۋما ءتيىستى زاڭ جوبالارىن 18 قىركۇيەكتە ءبىرىنشى وقىلىمدا، ال 24 قىركۇيەكتە ەكىنشى جانە ءۇشىنشى وقىلىمدا ماقۇلداعان بولاتىن.
