مەملەكەت باسشىسى قاسىم-جومارت توقاەۆ گەرمانياعا رەسمي ساپارى بارىسىندا قازاقپاراتتىڭ بەرليندەگى مەنشىكتى تىلشىسىنە ەكسكليۋزيۆتى سۇقبات بەردى، دەپ حابارلايدى «ادىرنا» ءتىلشىسى.
مەملەكەت باسشىسى قازاقستاننىڭ رەسەيمەن تولىققاندى ىنتىماقتاستىق باعىتىن بەرىك ۇستاناتىنىن اتاپ ءوتتى.
«بۇل ەلمەن ءبىزدى الەمدەگى ەڭ ۇزىن شەكارا بىرىكتىرەدى. ءباسپاسوز ءماسليحاتىندا ايتقانىمداي، بىزدە ءارتۇرلى سالالارداعى، سونىڭ ىشىندە ساۋدا جانە گۋمانيتارلىق بايلانىستارداعى ىنتىماقتاستىقتىڭ ەجەلدەن قالىپتاسقان ءداستۇرى بار. سانكتسيالارعا كەلەتىن بولساق، بۇۇ باس اسسامبلەياسىنىڭ جاقىندا وتكەن سەسسياسىندا جانە باسقا دا سويلەگەن سوزىمدە سانكتسيالىق تەكەتىرەس جاھاندىق داعدارىستىڭ شيەلەنىسۋى جاعدايىندا ەروزياعا ۇشىراعان حالىقارالىق قاتىناستاردى جاقسارتۋ تۇرعىسىنان مۇلدەم كەرى ناتيجە بەرەتىنىن اتاپ ءوتتىم. قازاقستاندا سانكتسيالىق شەكتەۋلەرگە جاتاتىن تاۋارلار جوق. قازاقستان سونداي-اق رەسەيگە پاراللەل دەپ اتالاتىن يمپورتقا قاتىسپايدى»،—دەدى ول.
پرەزيدەنت ءداستۇرلى تاۋارلار ساۋداسىنا دا توقتالدى.
«ءداستۇرلى تاۋارلار ساۋداسىنا كەلەر بولساق، ول ءوسىپ، وتكەن جىلى قازاقستان – رەسەي تاۋار اينالىمىنىڭ كولەمى 25 ملرد دوللارعا جەتتى.
جاقىندا استانادا «يننوپروم» كورمەسى ءساتتى ءوتتى. وعان پرەمەر-مينيستر ميحايل ميشۋستين باستاعان رەسەيلىك دەلەگاتسيا كەلدى. بۇل رەتتە قازاقستان سانكتسيالىق شەكتەۋلەردى ەسكەرۋگە ءماجبۇر جانە بۇل ماسەلە بويىنشا ءتيىستى حالىقارالىق ۇيىمدارمەن بايلانىستا.
مۇمكىندىكتى پايدالانا وتىرىپ، مەن ديپلوماتتاردى رەسەي مەن ۋكراينا اراسىنداعى بەيبىتشىلىك تۋرالى كەلىسسوزدەر ءۇشىن ءوزارا قولايلى نەگىز تابۋعا نازار اۋدارتقىم كەلەدى. بۇل وتە ماڭىزدى. ويتكەنى الەم ادامزاتتىڭ كوپشىلىگى ءۇشىن سالدارى اپاتتى بولاتىن جانە ولىمگە اكەلەتىن قاقتىعىستىڭ قاۋىپتى نۇكتەسىنە جاقىندادى»،—دەدى قاسىم-جومارت كەمەلۇلى.
