Elimizde 6 qazan kúni AES salý boıynsha referendým ótedi. Osyǵan baılanysty VIII saılanǵan Qazaqstan Respýblıkasy Parlamenti Májilisiniń Ekologııa máseleleri jáne tabıǵat paıdalaný komıtetiniń múshesi Erlan Barlybaevpen AES qurylysynyń ekologııaǵa áseri týraly bolǵan suqbatty nazarlaryńyzǵa usynamyz.
- Qoǵamda atom elektr stansııasyn salý elektr energııasynyń tarıfin qymbatatady degen pikir bar. Bul týraly ne aıta alasyz?
- Men bul istiń mamany bolmaǵannan keıin, maǵan bul suraqqa jaýap berý qıyn. Meniń oıymsha, atom elektr stanııasynyń quny qansha bolatynyn, qansha ýaqytty qajet etetinin, tarıftiń qandaı bolatynyn úkimettiń nemese ýákiletti organ esepteýi kerek. Bul týraly aıtylmaǵandyqtan qoǵamda tarıf kóterilýi múmkin degen pikir paıda boldy
- Sizdiń oıyńyzsha, AES qurylysy elektr qýatynyń tapshylyǵyn sheshe me? Úkimettiń Qazaqstan Respýblıkasynyń aýmaǵynda atom elektr stanııalaryn iske qosý jónindegi josparlary qanshalyqty senimdi?
- Iá, atom elektr stanııasyn salý arqyly elektr energııasynyń tapshylyǵyn sheshýge bolady. Úkimet usynǵandaı, búkil elektr energııasy naryǵynyń 10%-y AES esebinen sheshiledi dep oılaımyn. Bul – aıtarlyqtaı jetkilikti kólem.
- Elimizdegi ekologııalyq qoǵam Balqash kóliniń bolashaǵy týraly alańdaýda. AES salýdan Balqash kóline qaýip bar ma?
- Menińshe, Balqashtyń bolashaǵyna qaýip tóndiretin nárse joq. Óıtkeni qazirgi tehnologııa sýdy az tutynýǵa múmkindik beredi. Sondyqtan, bolashaqta búkil qurylys kezinde Balqash úshin qaýip nemese másele týyndamaıdy dep oılaımyn.
- Atom elektr stanııalarynyń qaldyqtary jergilikti halyqtyń densaýlyǵyna qalaı áser etýi múmkin?
- AES-tiń qaldyqtary baqylaýda bolatyndyqtan qaýip tóndirmeıdi. Búgingi kúngi tehnologııa táýekelderdi barynsha azaıtýǵa múmkindik beredi. Meniń oıymsha, bul jerde tolyq ıgeriletin bolady. Qaldyq qalǵannyń ózinde olardy saqtaýǵa bolatyn oryndar bar. Sondyqtan eshqandaı qaýip joq.
- Atom elektr stanııasynyń qurylysy aımaqtyń damýyna jáne jalpy el úshin qanshalyqty áser etedi dep oılaısyz?
- Birinshiden, bul jumys oryndarynyń kóbeıýi men jańa tehnologııalardyń artýyna áser etedi. Ekinshiden, atom energetıkasynyń damýyna yqpal etedi. Al munyń barlyǵy el ekonomıkasyna oń áserin tıgizedi dep esepteımin
