مەملەكەت باسشىسى V دۇنيەجۇزىلىك كوشپەندىلەر ويىندارىنا اتسالىسقان ازاماتتاردى مەملەكەتتىك ناگرادالارمەن ماراپاتتادى، دەپ حابارلايدى «ادىرنا» ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
قازاقستان رەسپۋبليكاسى پرەزيدەنتى قاسىم-جومارت توقاەۆتىڭ جارلىعىمەن استانا قالاسىندا وتكەن V دۇنيەجۇزىلىك كوشپەندىلەر ويىندارىنىڭ جۇلدەگەرلەرى، ولاردىڭ جاتتىقتىرۋشىلارى، سونداي-اق حالىقارالىق سپورت شاراسىن ۇيىمداستىرۋعا جانە وتكىزۋگە ەرەكشە ۇلەس قوسقان ازاماتتار مەملەكەتتىك ناگرادالارمەن ماراپاتتالدى.
اتاپ ايتقاندا، 1 ادام «پاراسات» وردەنىنىڭ جانە 7 ازامات «قۇرمەت» وردەنىنىڭ كاۆالەرى اتاندى. «ەرەن ەڭبەگى ءۇشىن» مەدالى 85, ال «شاپاعات» مەدالى 5 ادامعا بەرىلدى.
ەسكە سالا كەتەيىك، دۇنيەجۇزىلىك كوشپەندىلەر ويىندارى استانادا 8-13 قىركۇيەك ارالىعىندا ءوتتى. قازاقستان قۇراماسى 112 مەدال – 43 التىن، 32 كۇمىس جانە 37 قولا جەڭىپ الدى.
