جازۋشى، ادەبيەت زەرتتەۋشىسى، ابايتانۋشى جانە الاشتانۋشى تۇرسىن جۇرتباي تۇركى دۇنيەسىنىڭ رۋحاني-مادەني دامۋىنا قوسقان زور ۇلەسى ءۇشىن تۇركسوي حالىقارالىق ۇيىمىنىڭ التىن مەدالىمەن ماراپاتتالدى. قازاق رۋحانياتى ءۇشىن ايتۋلى جاڭالىقتى اقىن، جۋرناليست ۇلىقبەك ەسداۋلەت اتاپ ءوتتى، دەپ حابارلايدى “ادىرنا”.
مارتەبەلى ماراپاتتى انكارا قالاسىنداعى تۇركسوي حالىقارالىق ۇيىمىنىڭ شتاب-پاتەرىندە ۇيىمنىڭ باس حاتشىسى سۇلتان اكىمۇلى راەۆ سالتاناتتى تۇردە تابىستادى.
بۇل ماراپات – تۇرسىن جۇرتبايدىڭ قازاق ادەبيەتى مەن تاريحىن زەرتتەۋدەگى، الاش مۇراسىن زەردەلەۋدەگى جانە اباي شىعارماشىلىعىن ناسيحاتتاۋداعى كوپجىلدىق ەڭبەگىنە بەرىلگەن جوعارى باعا. عالىمنىڭ عىلىمي-زەرتتەۋ جۇمىستارى مەن شىعارماشىلىق ىزدەنىستەرى قازاق رۋحانياتىنىڭ عانا ەمەس، تۇتاس تۇركى الەمىنىڭ ورتاق مادەني مۇراسىن تانۋعا دا ەلەۋلى ۇلەس قوسىپ كەلەدى.
تۇرسىن جۇرتباي 1951 جىلى 15 تامىزدا سەمەي وڭىرىندەگى اباي اۋدانىنىڭ شاعان اۋىلىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن تامامداعان. ءار جىلدارى «جەتىسۋ» گازەتىندە، ء«بىلىم جانە ەڭبەك»، «جۇلدىز» جۋرنالدارىندا قىزمەت اتقارعان.
قالامگەردىڭ «دۋلىعا»، «قۇنانباي»، «ۇرانىم – الاش!..»، «بەسىگىڭدى تۇزە!» سىندى ەڭبەكتەرى قازاق ادەبيەتى مەن تاريحىنداعى ماڭىزدى زەرتتەۋلەر قاتارىنان ورىن الادى. ول ابايتانۋ، اۋەزوۆتانۋ جانە الاشتانۋ سالالارىنا ەلەۋلى ۇلەس قوسقان عالىم. 2002 جىلى پروفەسسور عىلىمي اتاعىن العان. ەڭبەكتەرى الەمنىڭ 15 تىلىنە اۋدارىلعان. قازاقستان جازۋشىلار وداعىنىڭ «الاش» جانە ءىلياس جانسۇگىروۆ اتىنداعى ادەبي سىيلىقتارىنىڭ لاۋرەاتى.
