پرەزيدەنت توقاەۆ قازاقستان مەن سەربيا اراسىنداعى بايلانىستى نىعايتۋعا قوسقان ۇلەسى ءۇشىن الەكساندر ۆۋچيچ ەلىمىزدىڭ ەڭ جوعارى مەملەكەتتىك ناگراداسى – «التىن قىران» وردەنىمەن ماراپاتتادى، دەپ حابارلايدى "ادىرنا" ۇلتتىق پورتالى.
مەملەكەت باسشىسى الەكساندر ءۆۋچيچتى ەلىن العا باستاپ كەلە جاتقان بەدەلدى ساياساتكەر رەتىندە اتاپ ءوتىپ، بۇل ماراپات قازاق حالقىنىڭ سەربيا باسشىسىنا جانە سەرب حالقىنا دەگەن ەرەكشە قۇرمەتىنىڭ بەلگىسى ەكەنىن ايتتى.
پرەزيدەنتتىڭ سوزىنشە، ەكى ەل اراسىنداعى قارىم-قاتىناس ءوزارا سەنىم مەن دوستىققا نەگىزدەلگەن. ساۋدا-ەكونوميكا، ينۆەستيتسيا جانە مادەني-گۋمانيتارلىق سالالارداعى ىنتىماقتاستىق نىعايىپ كەلەدى. قازىرگى كۇردەلى كەزەڭدە ارىپتەستىكتى جانداندىرۋدىڭ ماڭىزى زور ەكەنى اتاپ ءوتىلدى.
كەڭەيتىلگەن قۇرامداعى كەلىسسوزدەر قورىتىندىسى جاريا ەتىلدى. قاسىم-جومارت توقاەۆ الەكساندر ۆۋچيچپەن ساۋدا، كولىك-لوگيستيكا، ەنەرگەتيكا، ونەركاسىپ، اۋىل شارۋاشىلىعى، اقپاراتتىق تەحنولوگيالار جانە جاساندى ينتەللەكت سالالارىنداعى ىقپالداستىقتى تالقىلاعانىن مالىمدەدى.
قازىر قازاقستاندا 60-قا جۋىق سەرب كومپانياسى جۇمىس ىستەيدى. دەگەنمەن تاراپتار ساۋدا اينالىمىن ارتتىرىپ، جاڭا ينۆەستيتسيالىق جوبالاردى بىرلەسىپ جۇزەگە اسىرۋعا كەلىستى.
سونىمەن قاتار استانا مەن بەلگراد اراسىندا تىكەلەي اۋە رەيسىنىڭ اشىلۋى، ترانسكاسپي حالىقارالىق كولىك ءدالىزىنىڭ مۇمكىندىكتەرىن پايدالانۋ جانە ەنەرگەتيكا سالاسىنداعى ءوزارا ءىس-قيمىلدى كۇشەيتۋ ماسەلەلەرى ءسوز بولدى.
