مادەنيەت جانە اقپارات مينيسترلىگى جاس قالامگەرلەرگە ارنالعان «ەرلىك پەن ەڭبەك داستانى» اتتى اۆتورلار بايقاۋىن وتكىزەدى، دەپ حابارلايدى “ادىرنا” ۇلتتىق پورتالى.
اقپارات ءمينيسترى ايدا بالاەۆانىڭ ايتۋىنشا، بايقاۋ دارىندى اۆتورلارعا قولداۋ ءبىلدىرىپ، قوعامداعى ەڭبەك ماماندىقتارىنىڭ ماڭىزىن اشۋدى ماقسات ەتەدى.
«بۇل بايقاۋ كاسىبي شەبەرلىگىمەن قاجىرلى قىزمەت ەتىپ، ەلىمىزدى دامىتۋعا زور ۇلەس قوسىپ جۇرگەن تۇلعالاردى ۇلىقتاۋعا مۇمكىندىك بەرەدى. اتاپ ايتقاندا، مۇعالىمدەر، دارىگەرلەر، كەنشىلەر، فەرمەرلەر، قۇرىلىسشىلار، جۋرناليستەر، مۋزىكانتتار، كىتاپحاناشىلار جانە تاعى باسقالاردىڭ ەسەلى ەڭبەكتەرىن كوپكە ناسيحات ەتەدى»، - دەپ جازدى مينيستر.
جارىس جەڭىمپازى كەلەسى جىلى، ياعني 2025 جىلى رەسپۋبليكا كۇنىندە انىقتالادى.
«قازاقستان رەسپۋبليكاسىنىڭ مادەنيەت جانە اقپارات مينيسترلىگى ەڭ ۇزدىك كىتاپتى باسىپ شىعارىپ، ەل بويىنشا تاراتادى. وتىنىشتەر وسى جىلدىڭ 1 قازانىنان باستالادى»، - دەپ جازدى بالاەۆا.
