بيىل 21 اقپاندا قالا اكىمىنىڭ №464 قاۋلىسىنا سايكەس، تاراز قالاسى اۋماعىندا كوكتەمگى اباتتاندىرۋ جانە سانيتارلىق تازالاۋ جونىندەگى ەكى ايلىق جاريالانعان. ايلىق اياسىندا قالادا اتقارىلعان وڭدى ىستەر از ەمەس.
بەكىتىلگەن ءىس-شارا جوسپارىنا سايكەس ۇيىمداستىرىلعان اپتالىق سەنبىلىكتەرگە مەملەكەتتىك جانە جەكە نىسانداعى كاسىپورىندار، سونىمەن قاتار قالا تۇرعىندارى اتسالىسىپ، وزدەرىنە بەكىتىلگەن اۋماقتارى بويىنشا تازالىق جۇمىستارىن جۇرگىزدى.
قالا اۋماعىنداعى كوشەلەر مەن كوپقاباتتى تۇرعىن ءۇي اۋلالارىندا قوقىس قالدىقتارى تازالانىپ، ءشوبى شابىلدى. بۇل ىسكە تۇراقتى تۇردە 35 دانا تەحنيكا مەن اپتا سايىن 5000-عا جۋىق ادام كۇشى تارتىلدى. ناتيجەسىندە بارلىق اۋماق بويىنشا «جاسىل ەل – تاراز» جشس شامامەن 16 000 توننا تۇرمىستىق قاتتى قالدىقتاردى ارنايى ورىنعا شىعاردى. سونداي-اق 120 شاقىرىمدى قۇرايتىن ارىق جۇيەسى تازالاندى. اۋلا مەن كوشە جاعالارىندا 1 600 000 شارشى مەتر ءشوپ ورىلدى. سونىمەن قاتار قالا بويىنشا 78 كوشەنىڭ سىرلانۋى جوسپارلانسا، بۇگىنگى تاڭدا 30 كوشەنىڭ بويىندا ورنالاسقان 3152 دانا باعانا سىرلانىپ، قالپىنا كەلتىرىلدى. سونداي-اق كورىكتەندىرۋ جانە كوگەرىشتەندىرۋ ماقساتىندا قالا اۋماعىندا ورنالاسقان گۇلزارلار مەن ساياباقتاردا 60719 دانا كوپ جىلدىق جانە مەرزىمدىك گۇلدەر وتىرعىزىلدى. بۇعان قوسا ارنايى بەلگىلەنگەن جەرلەرگە 6954 دانا تالداردىڭ كوشەتتەرى ەگىلدى.
اقپاننىڭ 15-ىنەن باستاپ قالالىق ىشكى ىستەر باسقارماسىنىڭ قىزمەتكەرلەرىمەن بىرىگىپ، وكرۋگ ينسپەكتورلارى تاراپىنان تۇرعىندار اراسىندا تازالىقتى ساقتاۋ بويىنشا تۇسىندىرمە جۇمىستارى جۇرگىزىلۋدە. جۇيەلى جۇمىستىڭ ناتيجەسىندە كوشە بويىندا كەزدەيسوق قوقىس پەن ينەرتتى قۇرىلىس ماتەريالدارىن تاستاعان، قورشاعان ورتانى لاستاعان 556 ازامات انىقتالىپ، 468 ازاماتقا ەسكەرتۋلەر بەرىلسە، 88 تۇرعىنعا اكىمشىلىك قۇقىق بۇزۋشىلىق كودەكسىنە سايكەس حاتتاما تولتىرىلدى. سالىنعان ايىپپۇلدار كولەمى 1 595 239 تەڭگەنى قۇرادى. بىلتىرعى جىلمەن سالىستىرعاندا ايىپپۇل كولەمى 6 ەسەگە ارتقان. ماسەلەن، وتكەن جىلى كوشەگە قوقىس تاستاعان، ورتاق پايدالاناتىن ورىنداردى لاستاعان 14 ازاماتقا ايىپپۇل سالىنسا، بيىل جىل باسىنان باستاپ 88 ازامات ايىپپۇل ارقالادى.
قازىرگى تاڭدا قالانىڭ ساۋلەتتىك كەلبەتىن ساقتاۋ ماقساتىندا جانە بەيبەرەكەت ساۋدانىڭ الدىن الۋ ءۇشىن قالا اۋماعىنان زاڭسىز قويىلعان 161 دانا دۇڭگىرشەك انىقتالىپ، 67 داناسى الىندى. اكىمشىلىك قۇقىق بۇزۋشىلىق كودەكسىنە سايكەس دۇڭگىرشەك يەلەرىنە ەسكەرتۋلەر جاسالىندى.
سونىمەن قاتار قالادا تۇرمىستىق قاتتى قالدىقتى تاستاۋعا ارنالعان 328 الاڭشا بار. ولار 1540 دانا جاشىكپەن قامتىلعان. ايتالىق، 2023 جىلى قاجەتتىلىككە بايلانىستى 1120 دانا قوقىس جاشىگى ساتىپ الىنىپ، ەسكىرگەن جاشىكتەر الماستىرىلدى. بۇعان قوسا قالا اۋماعىنداعى وسى اتالعان الاڭشالاردا پوليەتيلەن قالدىقتاردى جيناۋ، شىعارۋ، قايتا وندەۋگە جىبەرۋ قىزمەتىمەن قالا بويىنشا «Kaz Ecology» جشس جانە جك «باحىت» اينالىسادى. بۇگىنگى تاڭدا شاھار اۋماعىندا بۇل كاسىپكەرلەر تاراپىنان 620-عا جۋىق سەتكالىق جاشىكتەر ورناتىلعان.
بۇدان بولەك، مەملەكەت باسشىسىنىڭ تاپسىرماسىمەن قولعا الىنعان «تازا قازاقستان» اكتسياسى اياسىندا وبلىسىمىزدا «تازا اۋلا. تازا ولكە. تازا ەل!» ەكولوگيالىق ناۋقانى باستاۋ الدى. اۋقىمدى اكتسيانىڭ شەڭبەرىندە ءار اپتا سايىن شاھاردا تازلىق جۇمىستارى جۇرگىزىلىپ، تالدار ەگىلۋدە. شاراعا تاراز قالاسىنىڭ اكىمى باقىتجان ورىنبەكوۆ، ارداگەرلەر، ەرىكتى جاستارمەن بىرگە قاتىسىپ، اكتسياعا ءوز ۇلەسىن قوسۋدا.
بۇل جۇمىستاردىڭ باستى ماقساتتارىنىڭ ءبىرى – مەكەمە قىزمەتكەرلەرىنەن باستاپ ەلگە ونەگە بولۋ ارقىلى حالىقتى ورتاق ىسكە جۇمىلدىرۋ. سوندىقتان تازالىق جۇمىستارى ءالى دە جالعاسىن تابادى.
