كۇننەن-كۇنگە وركەندەگەن تاراز قالاسى شۇرايلى شەجىرەسىمەن قوسا، شىرايلى كوركىمەن دە تالايدىڭ تاڭدانىسىن تۋدىرىپ كەلەدى. بۇل ءبىر جاعىنان كونە شاھاردىڭ تۋريزم ورتالىعىنا اينالۋىن جەدەلدەتە تۇسەدى. اسىرەسە، كوپقاباتتى تۇرعىن ۇيلەردىڭ سىرتقى كەلبەتى قالاعا ايالداعان ءاربىر ادامنىڭ نازارىن بىردەن اۋدارارى ءسوزسىز. سوندىقتان بىرەر جىلدىڭ بەدەرىندە تارازدا وسى باعىتتا ىلكىمدى ىستەر قولعا الىندى.
ارينە، بۇگىندە توزىعى جەتكەن ۇيلەردىڭ قالا كوركىن قاشىرىپ عانا قويماي، تۇرعىنداردىڭ تىرشىلىگى ءۇشىن دە قولايسىز جاقتارى كوبەيە باستاعانى بەلگىلى. وسىعان وراي، شاھار اۋماعىنداعى پايدالانۋعا بەرىلگەنىنە 30 جىلدان اسقان 1 103 ءۇيدىڭ بۇعان دەيىن 489-ى كۇردەلى جوندەۋدەن وتكىزىلسە، قالعان 614 ءۇيدى جاڭعىرتۋ الداعى ۋاقىتقا جوسپارلانۋدا.
ەرەكشە ايتا كەتەرلىگى، «وڭىرلەردى دامىتۋدىڭ 2020 جىلعا دەيىنگى باعدارلاماسى» جانە «نۇرلى جەر» 2021-2025 جىلدارعا ارنالعان تۇرعىن ءۇي-كوممۋنالدىق شارۋاشىلىقتى دامىتۋ باعدارلامالارى اياسىندا كوپپاتەرلى تۇرعىن ۇيلەرگە جوندەۋ جۇمىستارى 2011 جىلدان باستاپ قولعا الىنىپ، رەسپۋبليكالىق، جەرگىلىكتى بيۋدجەت پەن قايتارىم قاراجاتتى قوسا العاندا 16, 590 ملرد تەڭگەگە جوعارىدا اتالعان 489 ۇيگە جوندەۋ جۇمىستارى جۇرگىزىلدى. ناتيجەسىندە، كۇردەلى جوندەۋدى قاجەت ەتەتىن كوپپاتەرلى تۇرعىن ۇيلەردىڭ ۇلەسى 43-تەن 39 پايىزعا تومەندەدى. سونداي-اق تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى بويىنشا 2024 جىلعا 53 كوپپاتەرلى تۇرعىن ءۇي جاڭا كەيىپكە ەنبەك. بۇل بويىنشا بيۋدجەتتىك ءوتىنىم قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنە ۇسىنىلىپ، بيىل ءتيىستى قارجىنىڭ ءبولىنۋى قاراستىرىلدى.
بۇعان قوسا، 2025 جىلى 54 ۇيگە كۇردەلى جوندەۋ جۇمىستارىن جۇرگىزۋ ءۇشىن بيۋدجەتتىك ءوتىنىم قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنە تاپسىرىلعان.
سونىمەن قاتار «ينتەرستروي ازيا» جشس تاراپىنان تولە بي كوشەسىندە ورنالاسقان №11, «تۇرعىن ءۇي جوندەۋ»، «ابىروي ينۆەست» جانە «TarazGazNur» جشس-ءنىڭ مەردىگەرلىگىمەن «قاراتاۋ» ىقشاماۋدانى، №37 «ا»، №39 جانە «سالتانات» ىقشاماۋدانى، №29 «ا»، №29 «ب» جاتاقحانالارىنا ىشكى ارلەۋ، سۋ، جىلۋ، كارىز، ەلەكتر قۋاتىن جوندەۋ بويىنشا جۇمىستار جۇرگىزىلۋدە. بۇدان بولەك، كوممۋنالدىق مەنشىكتە تۇرعان «بايتەرەك» ىقشاماۋدانىنداعى №5, 8, 12, 14, 31, 39 ۇيلەرگە «ارقاس-ا»، «يۋگ-تەحسناب» جشس مەردىگەرلىگىمەن جوندەۋ جۇمىستارى قولعا الىندى.
بيىل تەك ىقشاماۋداندار عانا ەمەس، ورتالىقتاعى ۇيلەرگە دە باسىمدىق بەرىلۋدە. سونىڭ ايقىن ايعاعى – «قاراتاۋ قۇرىلىس 2030» جشس مەردىگەرلىگىمەن تولە بي داڭعىلىندا ورنالاسقان №38, 40, 44, 48, 50, 52, 54, 56, 57, 58, 59, جالپى سانى 11 كوپپاتەرلى تۇرعىن ءۇيدىڭ قاسبەتتەرى، شاتىرلارى كۇردەلى جوندەۋدەن وتۋدە.
وسى رەتتە ايتا كەتەرلىگى، اباي داڭعىلىنداعى №117, 121, 123, 128, 129, 130, 132, 134, جەلتوقسان كوشەسى، 71, ايتەكە بي كوشەسى، №1, 2 جانە قازىبەك بي كوشەسى، №103, 113, 120, 140 تۇرعىن ۇيلەردى دە جاڭعىرتۋ ماقساتىندا جوبالىق-سمەتالىق قۇجاتتامالارى ازىرلەنۋدە.
بۇگىندە تاراز قالاسىنىڭ تۇرعىن ءۇي قورىندا 1438 كوپپاتەرلى تۇرعىن ءۇي بار. ولاردىڭ بارلىعى كەلەشەكتە جوسپارعا ساي كەزەڭ-كەزەڭىمەن جاڭا كەيىپكە ەنەدى.
