قازىرگى تاڭدا تاراز قالاسىندا جول قۇرىلىسى مەن قوعامدىق كولىكتەردى جاڭارتۋعا ايرىقشا دەن قويىلىپ كەلەدى. اسىرەسە، شالعاي القاپتاردىڭ جاعدايى – باستى نازاردا.
ارينە، تاقتايداي تەگىس جول مەن سوڭعى ۇلگىدەگى اۆتوبۋستار تۇرعىنداردىڭ جايلى تۇرمىسىنا وڭ سەپتىگىن تيگىزەدى. بۇل ءوز كەزەگىندە ناقتى ورنى بەلگىلەنگەن، ىڭعايلى ايالدامالارعا دەگەن قاجەتتىلىكتى كوبەيتۋدە. قالانى دامىتۋدىڭ 3 جىلدىق جوسپارىندا دا بۇعان باسا ءمان بەرىلگەن.
سوعان وراي 2023 جىلى شاھار اۋماعىنا 36 دانا ايالداما ورناتۋ ءۇشىن جەرگىلىكتى بيۋدجەتتەن ءتيىستى قارجى قاراستىرىلعان ەدى. مەملەكەتتىك ساتىپ الۋ كونكۋرسى ناتيجەسىندە «RusStroy» جشس-مەن 21, «سترويتەلنايا كومپانيا NSN» جشس تاراپىنان 15 ايالداما ورناتۋ ءۇشىن كەلىسىم-شارت جاسالدى. سونداي-اق «جاسىل ەل-تاراز» جشس تاراپىنان بۇرىن قولدانىستا بولعان 6 ايالداما قايتا قالپىنا كەلتىرىلدى.
اتالعان جۇمىستار بيىل دا جالعاسىن تاۋىپ، «DarynKazStroyGroup» جشس-مەن كەلىسىم-شارت جاسالدى. ناتيجەسىندە بيىلعا جوسپارلانعان 75 ايالدامانىڭ 45-ءى تولىق ورناتىلسا، 21 ايالدامانىڭ ءبورديۋرى قويىلىپ، نەگىزدەمەسى دايىندالدى. ال قالعان 9 ايالداما بويىنشا دايىندىق جۇمىستارى جۇرگىزىلۋدە. بۇل جۇمىستارعا 3 بريگادا جۇمىلدىرىلعان.
