بانسكا-بىستريتسا قالاسىنىڭ مەملەكەتتىك كىتاپحاناسىندا سلوۆاك تىلىنە اۋدارىلعان «عاجايىپ باق» بالالار ەرتەگىلەرى جيناعىنىڭ بىرەگەي تۇساۋكەسەرى ءوتتى. ءىس-شاراعا قالالىق اكىمشىلىكتىڭ، مادەني جانە ءبىلىم بەرۋ ۇيىمدارىنىڭ باسشىلىعى، سونداي-اق بالالار مەن جاستار قاتىستى.
كىتاپتى كوپشىلىككە تانىستىرا وتىرىپ، قر ەلشىسى تولەجان بارلىباەۆ قازاقستان مەن سلوۆاكيا اراسىندا حالىقتىڭ مادەني مۇراسىن ءوزارا زەردەلەۋ مەن مادەني الماسۋدىڭ ماڭىزدىلىعىن اتاپ ءوتتى. «قازاق ەرتەگىلەرى – قازاق حالقىنىڭ مادەني كودىن جانە اۋىزشا حالىق شىعارماشىلىعىنىڭ باي داستۇرلەرىن بەينەلەيتىن ۇلى دالا فولكلورىنىڭ اجىراماس بولىگى. وسىنداي قۇندىلىقتارىمىزبەن سلوۆاكيالىق دوستارىمىزبەن بولىسە الاتىندىعىمىزعا قۋانىشتىمىز»، – دەدى ديپلومات.
اكىمشىلىك جانە بانسكا-بىستريتسا ق. مەملەكەتتىك كىتاپحاناسىنىڭ باسشىلىعى قازاق ەرتەگىلەر كىتابىنىڭ شىعۋىن قۇپتاپ، بۇل جاس سلوۆاك وقىرماندارعا قازاق حالقىنىڭ ادەبي داستۇرلەرىمەن تانىسۋعا مۇمكىندىك بەرەتىنىن، سونداي-اق جاستار اراسىندا وقۋدى ناسيحاتتاۋ ءۇشىن بىرلەسكەن مادەني جوبالاردى قولداۋدىڭ ماڭىزدىلىعىن اتاپ ءوتتى.
«عاجايىپ باق» كىتابى كۇن استىنداعى كۇنكەي، ايسۇلۋ جانە ونىڭ ءۇش اعاسى، قوبىلاندى، ابات جانە اقباي باتىرلاردىڭ ەرلىكتەرى، اياز بي اڭىزدارى مەن الدار كوسەنىڭ شىتىرمان وقيعالارى تۋرالى ەرتەگىلەردىڭ تاڭداۋلى جيناعى. كىتاپتا سونداي-اق قازاق حالقىنىڭ پوەتيكالىق شىعارماشىلىعىن، ونىڭ جاقسىلىقتىڭ زۇلىمدىقتى جەڭۋىنە دەگەن بەرىك سەنىمىن بەينەلەيتىن جانۋارلار مەن قۇستار تۋرالى ەرتەگىلەر ۇسىنىلعان. ەرتەگىلەردىڭ ادەبي-كوركەم اۋدارماسىن 80-ءشى جىلدارى كورنەكتى سلوۆاك جازۋشىسى، اقىن جانە اۋدارماشى گەلەنا كريجانوۆا-بريندزوۆا (1922-1990 جج.) جاساعان. ەرتەگىلەر جيناعىنىڭ العاشقى تارالىمى 500 دانادان اسادى. جاقىن ارادا كىتاپتار سلوۆاكيانىڭ كىتاپحانا جانە كورمە قورلارىنا تۇسەدى.
تۇساۋكەسەر اياسىندا كىلەمدەرمەن، توقىلعان ورنەكتى تاسپالارمەن، قازاق مۋزىكالىق اسپاپتارىمەن جانە ساندىك-قولدانبالى ونەر زاتتارىمەن بەزەندىرىلگەن قازاق كيىز ءۇيىنىڭ ينتەرەرىنىڭ كورمەسى ءوتتى. كورمەگە كەلۋشىلەر يۋنەسكو-نىڭ ماتەريالدىق ەمەس مادەني مۇرا تىزىمىنە ەنگەن كيىز ءۇيدىڭ مىڭجىلدىق تاريحىمەن جانە ونى جاساۋدىڭ بىرەگەي شەبەرلىگىمەن تانىسا الدى.
تۇساۋكەسەرگە قاتىسقان جاس قاتىسۋشىلاردىڭ نازارىنا «اقساق قۇلان» انيماتسيالىق ءفيلمى ۇسىنىلدى. قازاق ەرتەگىلەرى نەگىزىندەگى جۇمباقتار سايىسى بالالاردىڭ ۇلكەن قىزىعۋشىلىعىن تۋدىردى. ءىس-شارانىڭ بارلىق قاتىسۋشىلارى سىيلىق رەتىندە «عاجايىپ باق» ەرتەگىلەر كىتابىن، سونداي-اق قازاقستاننان بۋكلەتتەر مەن كادەسىيلار الدى.
