Banska-Bystrıa qalasynyń Memlekettik kitaphanasynda slovak tiline aýdarylǵan «Ǵajaıyp baq» balalar ertegileri jınaǵynyń biregeı tusaýkeseri ótti. Is-sharaǵa qalalyq ákimshiliktiń, mádenı jáne bilim berý uıymdarynyń basshylyǵy, sondaı-aq balalar men jastar qatysty.
Kitapty kópshilikke tanystyra otyryp, QR Elshisi Tólejan Barlybaev Qazaqstan men Slovakııa arasynda halyqtyń mádenı murasyn ózara zerdeleý men mádenı almasýdyń mańyzdylyǵyn atap ótti. «Qazaq ertegileri – qazaq halqynyń mádenı kodyn jáne aýyzsha halyq shyǵarmashylyǵynyń baı dástúrlerin beıneleıtin uly dala folklorynyń ajyramas bóligi. Osyndaı qundylyqtarymyzben slovakııalyq dostarymyzben bólise alatyndyǵymyzǵa qýanyshtymyz», – dedi dıplomat.
Ákimshilik jáne Banska-Bystrıa q. Memlekettik kitaphanasynyń basshylyǵy qazaq ertegiler kitabynyń shyǵýyn quptap, bul jas slovak oqyrmandarǵa qazaq halqynyń ádebı dástúrlerimen tanysýǵa múmkindik beretinin, sondaı-aq jastar arasynda oqýdy nasıhattaý úshin birlesken mádenı jobalardy qoldaýdyń mańyzdylyǵyn atap ótti.
«Ǵajaıyp baq» kitaby kún astyndaǵy Kúnkeı, Aısulý jáne onyń úsh aǵasy, Qobylandy, Abat jáne Aqbaı batyrlardyń erlikteri, Aıaz bı ańyzdary men Aldar Kóseniń shytyrman oqıǵalary týraly ertegilerdiń tańdaýly jınaǵy. Kitapta sondaı-aq qazaq halqynyń poetıkalyq shyǵarmashylyǵyn, onyń jaqsylyqtyń zulymdyqty jeńýine degen berik senimin beıneleıtin janýarlar men qustar týraly ertegiler usynylǵan. Ertegilerdiń ádebı-kórkem aýdarmasyn 80-shi jyldary kórnekti slovak jazýshysy, aqyn jáne aýdarmashy Gelena Krıjanova-Brındzova (1922-1990 jj.) jasaǵan. Ertegiler jınaǵynyń alǵashqy taralymy 500 danadan asady. Jaqyn arada kitaptar Slovakııanyń kitaphana jáne kórme qorlaryna túsedi.
Tusaýkeser aıasynda kilemdermen, toqylǵan órnekti taspalarmen, qazaq mýzykalyq aspaptarymen jáne sándik-qoldanbaly óner zattarymen bezendirilgen qazaq kıiz úıiniń ıntereriniń kórmesi ótti. Kórmege kelýshiler IýNESKO-nyń materıaldyq emes mádenı mura tizimine engen kıiz úıdiń myńjyldyq tarıhymen jáne ony jasaýdyń biregeı sheberligimen tanysa aldy.
Tusaýkeserge qatysqan jas qatysýshylardyń nazaryna «Aqsaq qulan» anımaııalyq fılmi usynyldy. Qazaq ertegileri negizindegi jumbaqtar saıysy balalardyń úlken qyzyǵýshylyǵyn týdyrdy. Is-sharanyń barlyq qatysýshylary syılyq retinde «Ǵajaıyp baq» ertegiler kitabyn, sondaı-aq Qazaqstannan býkletter men kádesyılar aldy.
