ەڭبەكپەن كەلگەن تابىس، مانساپتاعى ورلەۋ، ۇجىمنىڭ قۇرمەتىنە بولەنۋ، تۇراقتى ەڭبەكاقى مەن لايىقتى دەمالىس – مۇنىڭ بارلىعى ادال ەڭبەكتىڭ ناتيجەسى. قازاقستاندا ەڭبەكقور، ىسىنە بەرىلگەن جانداردى قۇرمەتتەۋ ماقساتىندا ەڭبەك كۇنى اتاپ وتىلەدى. بۇل مەرەكە بيىل اباي وبلىسىندا دا كەڭ اۋقىمدا ۇيىمداستىرىلىپ، كاسىپكەرلەر كورمەسى مەن بوس جۇمىس ورىندارىنىڭ جارمەڭكەسى ءوتتى.
بەسقاراعاي اۋدانىنان كەلگەن كوپبالالى انا، كاسىپكەر شۇعىلا كارىپوۆا ءوز ءىسىن دامىتۋ ءۇشىن مەملەكەتتەن گرانت الىپ، بۇگىندە ءسۇت ونىمدەرىن وندىرۋمەن اينالىسۋدا.
– قازىرگى ۋاقىتتا قۇرت پەن ماي جاساپ، ساتىلىمعا شىعارىپ وتىرمىن. تۇراقتى تابىس بار. وسىنداي مۇمكىندىكتەر ۇسىنعان مەملەكەتكە العىسىم شەكسىز. بارشاڭىزدى ەڭبەك كۇنىمەن قۇتتىقتايمىن! – دەپ شۇعىلا كارىپوۆا ءوزىنىڭ قۋانىشىمەن ءبولىستى.
بوس جۇمىس ورىندارىنىڭ جارمەڭكەسىنە ۇلتتىق گۆارديا وكىلدەرى دە قاتىسىپ، اسكەري بولىمدەردە بوس ورىندار بار ەكەنىن حابارلادى.
ەڭبەك موبيلدىلىگى ورتالىعىنىڭ ديرەكتورى ەركەبۇلان تۇرسىن اباي وبلىسىنىڭ بىرنەشە اۋداندارىنان كەلگەن كاسىپكەرلەردىڭ دە بەلسەندىلىك تانىتىپ وتىرعانىن اتاپ ءوتتى.
– بۇگىنگى جارمەڭكە ەڭبەك كۇنىنە ارنالعان. وعان 29 كاسىپورىن مەن ۇيىم قاتىسىپ، 300-گە جۋىق بوس جۇمىس ورنىن ۇسىندى. سونىمەن قاتار، 2023-2024 جىلدارى مەملەكەتتىك گرانت العان كاسىپكەرلەر دە ءوز ونىمدەرىن ارنايى كورمەگە قويدى. كورمەگە بەسقاراعاي، اياگوز، جارما، اباي، بورودۋليحا اۋداندارىنىڭ كاسىپكەرلەرى قاتىسىپ وتىر، – دەدى ەركەبۇلان تۇرسىن.
جارمەڭكەدە ءىرى كاسىپورىندار دا بولدى. ولاردىڭ قاتارىندا «قاراجىرا» اق، «Daewoo Bus Kazakhstan» جشس، «سەماز» جشس، «Qazaq Astyq Group» جشس، «سەمەي تسەمەنت زاۋىتى» جشس، «شىعىس برويلەر» جشس، «سەمەي قۇرىلىس ماتەريالدارى» جشس سياقتى بەلگىلى مەكەمەلەر بار.
بورودۋليحا اۋدانىنىڭ نوۆوپوكروۆكا اۋىلىنىڭ تۇرعىنى رىسقايشا ولجاەۆا دا مەملەكەتتەن گرانت الىپ، مال شارۋاشىلىعىن دامىتىپ كەلەدى. كاسىپكەر ءوزىنىڭ ونىمدەرىن جارمەڭكەدە كوپشىلىككە ۇسىندى.
– بۇگىن ەڭبەك كۇنىندە ونىمدەرىمىزدى جۇرت نازارىنا ۇسىنۋدامىز. اۋىل شارۋاشىلىعى – ەڭبەكقورلىقتى تالاپ ەتەتىن سالا، ەرتە تۇرىپ، كەش جاتامىز. وسىنداي شارالاردى ءجيى وتكىزىپ تۇرسا دەگەن تىلەگىم بار. مەن مەملەكەتتەن گرانت الىپ، مال ساتىپ الىپ، شارۋاشىلىعىمدى دامىتتىم. بارشا قازاقستاندىقتاردى ەڭبەك كۇنىمەن قۇتتىقتايمىن! – دەپ ءوز ويىن قورىتىندىلادى كاسىپكەر.
ەڭبەك كۇنىنە ارنالعان مەرەكەلىك شارالار مۇنىمەن شەكتەلمەدى. سەمەي قالاسىنىڭ ونەرپازدارى اۆتوبۋس جۇرگىزۋشىلەرى مەن كوندۋكتورلاردى ەرەكشە قۇتتىقتاپ، قوعامدىق كولىكتە ءان شىرقاپ، جولاۋشىلاردىڭ دا كوڭىلىن سەرپىلتتى. سونىمەن قاتار، بلوگەرلەر شاعىن چەللەندج ۇيىمداستىرىپ، ەڭبەكقور سەمەيلىكتەرگە – ءوز ءىسىنىڭ ماماندارىنا كوفە مەن شوكولاد سىيلاپ، ولاردىڭ ەڭبەگىن جوعارى باعالادى.
پوسموترەت ەتۋ پۋبليكاتسيۋ ۆ Instagram
