اباي وبلىسىنىڭ اياگوز اۋدانى اكىمىنىڭ ورىنباسارى قىزمەتىنە بالۋان، «قازاقستان بارىسى» ءتۋرنيرىنىڭ ەكى دۇركىن جەڭىمپازى ايبەك سەرىكبولۇلى نۇعىماروۆ تاعايىندالدى، بۇل تۋرالى Sportinside.kz سايتى جازدى، دەپ حابارلايدى “ادىرنا”.
ايبەك نۇعىماروۆ – قازاق كۇرەسىنەن قازاقستاننىڭ ەڭبەك سىڭىرگەن سپورت شەبەرى، سونداي-اق دزيۋدو جانە سامبو بويىنشا سپورت شەبەرى. ول – ون دۇركىن قازاقستان چەمپيونى، ءتورت دۇركىن ازيا چەمپيونى، «الەم كۋبوگىنىڭ» ءۇش دۇركىن يەگەرى، قازاق كۇرەسىنەن الەمنىڭ ءتورت دۇركىن چەمپيونى، «ەۋرازيا بارىسى» حالىقارالىق ءتۋرنيرىنىڭ ءتورت دۇركىن، جانە «الەم بارىسى» ءتۋرنيرىنىڭ ءۇش دۇركىن جەڭىمپازى.
سونىمەن قاتار، ايبەك نۇعىماروۆ – «AMANAT» پارتياسىنىڭ ساياسي كەڭەسى مەن رەسپۋبليكالىق ساياسي كەڭەستىڭ مۇشەسى، VII جانە VIII شاقىرىلىمداعى اباي وبلىستىق ءماسليحات دەپۋتاتى بولعان. ول ەل سپورتىنىڭ دامۋىنا سىڭىرگەن ەڭبەگى ءۇشىن بىرقاتار مەملەكەتتىك ماراپاتتار مەن جوعارى دارەجەلى ناگرادالارعا يە بولعان.
ايتا كەتسەك، ايبەك نۇعىماروۆ 1987 جىلدىڭ 3 ماۋسىمىندا اباي وبلىسىنا قاراستى قۇندىزدى اۋىلىندا دۇنيەگە كەلگەن. ول سەمەي پوليتەحنيكالىق كوللەدجىن «زاڭگەر»، سەمەي مەملەكەتتىك پەداگوگيكالىق ينستيتۋتىن «دەنە شىنىقتىرۋ»، ال قازاق يننوۆاتسيالىق گۋمانيتارلىق-زاڭ ۋنيۆەرسيتەتىن «قۇقىقتانۋ» ماماندىعى بويىنشا تامامداعان. كەيىن ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قۇقىقتانۋ ماگيسترى دارەجەسىن قورعاعان.
ەڭبەك جولىن 2010 جىلى شقو وليمپيادالىق رەزەرۆتەگى №1 بالالار مەن جاسوسپىرىمدەر سپورت مەكتەبىندە جاتتىقتىرۋشى-وقىتۋشى رەتىندە باستاعان. 2013–2019 جىلدار ارالىعىندا شىعىس قازاقستان وبلىسىنىڭ دەنە شىنىقتىرۋ جانە سپورت باسقارماسىنا قاراستى جوعارى سپورت شەبەرلىگى مەكتەبىندە اعا نۇسقاۋشى-ادىسكەر قىزمەتىن اتقارعان. ال 2019 جىلدان بەرى سەمەي قالاسىنداعى كولىك كوللەدجىنىڭ ديرەكتورى لاۋازىمىندا بولعان.
