1 جەلتوقساندا وبلىس اكىمى بەرىك ءۋاليدىڭ توراعالىعىمەن كەڭەيتىلگەن اپپاراتتىق كەڭەس ءوتتى. جيىندا تۇماۋ جانە جەدەل رەسپيراتورلىق ۆيرۋستىق ينفەكتسيالار (جرۆي) بويىنشا ەپيدەميولوگيالىق جاعداي مەن 2025 جىلعا جول سالۋ جانە جوندەۋ جوبالارىنىڭ ىسكە اسىرىلۋ بارىسى تالقىلاندى. كەڭەسكە وبلىستىق باسقارما باسشىلارى، وڭىرلىك دەپارتامەنت جەتەكشىلەرى قاتىستى. اۋدان جانە قالا اكىمدەرى بەينەرەجيمدە قوسىلدى.
كۇن تارتىبىندەگى ماسەلەلەر بويىنشا سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى نۇرجان نوعايباەۆ، دەنساۋلىق ساقتاۋ باسقارماسىنىڭ باسشىسى تالعات مولدابەكوۆ، جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مەرەي بايىرحان، «قازاۆتوجول» ۇك» اق وبلىستىق فيليالىنىڭ باسشىسى ايبەك انۋاربەكوۆ جانە «جول اكتيۆتەرى ساپاسىنىڭ ۇلتتىق ورتالىعى» رمك وبلىستىق فيليالىنىڭ ديرەكتورى مەيىرجان باۋىرجانۇلى باياندادى.
وبلىستا تۇماۋ جانە جرۆي بويىنشا ەپيدەميولوگيالىق جاعداي تۇراقتى باقىلاۋدا. جەرگىلىكتى بيۋدجەت ەسەبىنەن حالىقتىڭ وسال جانە تاۋەكەل توپتارىنا 60 مىڭ دوزا ۆاكتسينا ساتىپ الىندى. بارلىعى 60 701 ادام ەگىلدى. مەديتسينالىق ۇيىمداردا ءتۇسىندىرۋ جۇمىستارى جۇرگىزىلىپ، ۇجىمدىق يممۋنيتەتتى قالىپتاستىرۋدىڭ ماڭىزى حالىققا جۇيەلى تۇردە جەتكىزىلىپ كەلەدى. وڭىردە بارلىعى 246 ينفەكتسيالىق توسەك-ورىن بار.
مەديتسينالىق ۇيىمداردا ءدارى-دارمەك پەن مەديتسينالىق جابدىقتار جەتكىلىكتى. بارلىق مساك ۇيىمدارىندا 110 سۇزگى كابينەتى، 40 جەدەل جاردەم كابينەتى جۇمىس ىستەيدى.
قالاداعى 6 ستاتسيوناردا جانە بارلىق اۋداندىق اۋرۋحانالاردا وقشاۋلاۋ بولمەلەرى ۇيىمداستىرىلعان. ەپيدجاعداي دەنساۋلىق ساقتاۋ مينيسترلىگىمەن بىرلەسىپ كۇندەلىكتى باقىلاۋعا الىنعان.
ايماق باسشىسى جەلتوقساننىڭ ورتاسىنا دەيىن تۇماۋ جانە جرۆي ءوسىمى كۇتىلەتىنىن اتاپ ءوتىپ، ءبىرىنشى ورىنباسارى ەربول سادىر مەن دەنساۋلىق ساقتاۋ باسقارماسىنىڭ باسشىسى تالعات مولدابەكوۆكە بارلىق مەديتسينالىق، ءبىلىم بەرۋ جانە الەۋمەتتىك مەكەمەلەردە بەتپەردە رەجيمىن ساقتاۋدى، ينفەكتسيالىق توسەك-ورىندارعا كۇندەلىكتى مونيتورينگ جۇرگىزۋدى جانە قوسىمشا رەزەرۆتىك ورىندار دايىنداۋدى تاپسىردى. دەنساۋلىق ساقتاۋ باسقارماسىنا اۋدان جانە قالا اكىمدەرىمەن بىرلەسە وتىرىپ تۇماۋعا قارسى ەكپە مەن الدىن الۋ شارالارى بويىنشا ءتۇسىندىرۋ جۇمىسىن كۇشەيتۋ قاجەتتىگىن ايتتى.
