بۇگىن اياگوز قالاسىندا «كەلەشەك مەكتەپتەرى» ۇلتتىق جوباسى اياسىندا زاماناۋي ۇلگىدەگى جاڭا مەكتەپ پايدالانۋعا بەرىلدى. اشىلۋ سالتاناتىنا وبلىس اكىمى بەرىك ءۋالي، قر وقۋ-اعارتۋ ءمينيسترى جۇلدىز سۇلەيمەنوۆا قاتىسىپ، ۇستازدار، وقۋشىلار جانە اتا-انالاردى ايتۋلى وقيعامەن قۇتتىقتادى.
«مەملەكەت باسشىسى قاسىم-جومارت كەمەلۇلى توقاەۆ ءبىلىم سالاسىنا، مۇعالىمدەردىڭ مارتەبەسىن كوتەرۋگە ءاردايىم ەرەكشە كوڭىل ءبولىپ كەلەدى. پرەزيدەنتتىڭ باستاماسىمەن قولعا الىنعان «كەلەشەك مەكتەپتەرى» جوباسى اياسىندا اباي وبلىسىندا ءۇش مەكتەپ سالىندى. بۇگىن، مىنە، سول يگى باستامانىڭ جالعاسى رەتىندە اياگوز قالاسىندا 600 ورىندىق ءتورتىنشى مەكتەپتىڭ اشىلۋ سالتاناتىنا جينالىپ وتىرمىز. وقۋ-اعارتۋ ءمينيسترى جۇلدىز دوسبەرگەنقىزىنا جەرلەستەرىمىزدىڭ اتىنان ايرىقشا العىس بىلدىرەمىز. مينيستر رەتىندەگى ءبىرىنشى مەكتەبىن وسى اباي ەلىندە اشىپ جاتقانى ءبىز ءۇشىن ۇلكەن مارتەبە. بۇل مەكتەپ اياگوز قالاسىنداعى مەكتەپ تاپشىلىعى ماسەلەسىن شەشۋگە سەپتىگىن تيگىزەدى. شەتكەرى اۋدان تۇرعىندارىنا ارنالعان، بارلىق جاعداي جاسالعان زاماناۋي ءبىلىم ورداسى. پرەزيدەنتتىڭ قولداۋىمەن اشىلىپ جاتقان مەكتەپتە ءبىلىم العان وقۋشىلار الداعى ۋاقىتتا رەسپۋبليكالىق، حالىقارالىق وليمپيادالارعا قاتىسىپ، ءوز مۇمكىندىكتەرىن كورسەتەدى دەپ ويلايمىز. جاڭا مەكتەپ قۇتتى بولسىن»، – دەدى ايماق باسشىسى.
وقۋ-اعارتۋ ءمينيسترى جۇلدىز سۇلەيمەنوۆا «كەلەشەك مەكتەپتەرى» ۇلتتىق جوباسى اياسىندا اشىلعان مەكتەپتەردىڭ ءوڭىردىڭ ءبىلىم سالاسىنا تىڭ سەرپىن بەرەتىنىن اتاپ ءوتتى.
«حالىقارالىق پاندىك وليمپيادالار، عىلىمي جوبا جارىستارى بويىنشا 20 ءوڭىردىڭ ىشىندە اباي وبلىسىنىڭ وقۋشىلارى كوش باستاپ تۇر. بۇل اباي وبلىسىنىڭ جاس ورەندەرىنىڭ عىلىم مەن بىلىمگە قۇشتار ەكەنىن كورسەتەدى. الداعى ۋاقىتتا بيۋدجەت مۇمكىندىكتەرىنە قاراي اقسۋات، ماقانشى، ءۇرجار اۋداندارىنا «كەلەشەك مەكتەپتەرىن» سالۋدى قاراستىراتىن بولامىز. جاڭا مەكتەپ قۇتتى بولسىن! وسى مەكتەپتەن ءبىلىم العان وقۋشىلار ەلىمىزدىڭ ەرتەڭىنە ۇلەس قوساتىن ازاماتتار بولسىن»، - دەدى ول.
وقۋ-اعارتۋ ءمينيسترى مەكتەپتىڭ پاندىك وقۋ كابينەتتەرىن، زەرتحانالاردى، سپورت زالدى ارالاپ، وقۋشىلارمەن، مۇعالىمدەرمەن، اتا-انالارمەن پىكىرلەستى. مەكتەپ وقۋشىلارىنىڭ ونەرىن تاماشالادى. وبلىس اكىمىمەن بىرگە مەكتەپ اۋلاسىنا اعاش كوشەتتەرىن وتىرعىزدى.
جاڭا مەكتەپ ءۇش قاباتتى، زاماناۋي تالاپتارعا ساي سالىنعان ءۇش عيماراتتان تۇرادى. جالپى اۋماعى 9 992,8 شارشى مەتر. 600 وقۋشىعا ارنالعان ءبىلىم ورداسىندا 35 وقۋ كابينەتى بار. ونىڭ ىشىندە فيزيكا، حيميا، بيولوگيا، ينفورماتيكا، STEM جانە روبوتوتەحنيكا زەرتحانالارى تولىق جابدىقتالعان. سونداي-اق سپورت جانە اكت زالدارى، مەديتسينالىق پۋنكت، اسحانا مەن العاشقى اسكەري دايىندىق كابينەتى بار. مەكتەپ جاراتىلىستانۋ-ماتەماتيكالىق باعىتتا جۇمىس ىستەيدى. مۇندا 42 پەداگوگ قىزمەت ەتەدى، ولاردىڭ اراسىندا 10 پەداگوگ-زەرتتەۋشى، 8 پەداگوگ-ساراپشى جانە 11 پەداگوگ-مودەراتور بار. وقىتۋ تولىق قازاق تىلىندە جۇرگىزىلەدى.
بۇل – بيىل اباي وبلىسىندا «كەلەشەك مەكتەپتەرى» جوباسى اياسىندا اشىلعان ءتورتىنشى ءبىلىم ورداسى. بۇعان دەيىن بەسقاراعاي اۋدانىندا 300 ورىندىق، سەمەي قالاسىنىڭ قاراعايلى ىقشام اۋدانىندا 1200 ورىندىق، ۆودنىي كەنتىندە 600 ورىندىق مەكتەپتەر پايدالانۋعا بەرىلگەن بولاتىن.
قازىرگى ۋاقىتتا وبلىس ورتالىعىنداعى شىعىس كەنتىندە 300 ورىندىق مەكتەپتىڭ قۇرىلىسى جۇرگىزىلىپ جاتىر. سونىمەن قاتار جارما اۋدانىنىڭ سۋىقبۇلاق اۋىلىندا 100 ورىندىق مەكتەپتىڭ قۇرىلىسى باستالدى. اقسۋات اۋدانىنىڭ ەكپىن اۋىلىندا 300 ورىندىق مەكتەپ قۇرىلىسىنا جوبالىق-سمەتالىق قۇجاتتاما ازىرلەنىپ، ساراپتاماعا جولدانعان. سونداي-اق سەمەي قالاسىنداعى №11 ورتا مەكتەپكە جاڭا عيمارات سالۋ ءۇشىن جوبالىق قۇجاتتار دايىندالۋدا. ەكى نىسان دا اپاتتى دەپ تانىلعان بولاتىن. بۇل جوبالار تولىق ىسكە اسقاندا مىڭعا جۋىق بالانىڭ ساپالى ءبىلىم الۋىنا مۇمكىندىك بەرەدى.
